სამხრეთ კორეის ქალაქ კვანჯუში ყოფილი ციხის ტერიტორიაზე მიმდინარე სამშენებლო სამუშაოების დროს 250 ადამიანის ნეშტი აღმოაჩინეს. ინფორმაციას ამის შესახებ სააგენტო Yonhap-ი ავრცელებს.
პოლიციის ინფორმაციით, ცხედრები კრიმინალისტებმა შეისწავლეს და დაასკვნეს, რომ ისინი სულ მცირე 250 ადამიანს ეკუთვნის.
სავარაუდოდ, ცხედრები 1980 წელს ანტისამთავრობო გამოსვლების დროს უგზო-უკვლოდ დაკარგულებს ეკუთვნის, რომლებიც ფარულად სიკვდილით დასაჯეს და ციხის ტერიტორიაზე დაკრძალეს. კიდევ ერთი ვერსიით, ცხედრები ციხეში გარდაცვლილ პატიმრებს ეკუთვნის, რომლებსაც ნათესავებმა არ მოაკითხეს.
1980 წლის მაისში სამხრეთ კორეაში დემოკრატიული ცვლილებების მოთხოვნით მასობრივი დემონსტრაციები გაიმართა. პრეზიდენტ ჩონ დუ ხვანის ბრძანებით, სამხედროებმა დემონსტრაციები ძალის გამოყენებით დაშალეს. ოფიციალური მონაცემებით, ასობით ადამიანი გარდაიცვალა, ათასობით კი დაშავდა.
კომენტარები