ეუთოს თავმჯდომარე ქვეყანა, შვეიცარია, „ქართული ოცნების“ წარმომადგენლების განცხადებებით შეშფოთებას გამოთქვამს. საუბარია ვარშავაში მიმდინარე ეუთოს კონფერენციაში მონაწილე ქართველი უფლებადამცველების მიმართ გაკეთებულ კომენტარებზე.
დღეს, 8 ოქტომბერს, ვარშავაში მიმდინარე კონფერენცია ეუთოს თავმჯდომარე ქვეყნის, შვეიცარიის წარმომადგენელმა სწორედ ამ განცხადებაზე პასუხით გახსნა და „ქართული ოცნების“ წარმომადგენლებს შეახსენა, რომ ეუთოს ღონისძიებებში სამოქალაქო საზოგადოების წარმომადგენლების უსაფრთხო მონაწილეობა, ყოველგვარი საპასუხო ზომების გარეშე, ორგანიზაციის მთავარი ფასეულობაა.
„დღეს ვარშავის ადამიანური განზომილების კონფერენციის მეოთხე დღე იწყება. შვეიცარიის თავმჯდომარეობას სურს, შეახსენოს ყველა მონაწილეს ამ შეხვედრის ქცევის კოდექსი და მოგიწოდებთ, გაეცნოთ მას ღონისძიების ვებგვერდზე. ისეთი პლატფორმის უზრუნველყოფა, სადაც სამოქალაქო საზოგადოების წარმომადგენლებს შეუძლიათ მონაწილეობა და ჩართულობა ეუთოს მონაწილე სახელმწიფოებთან და აღმასრულებელ სტრუქტურებთან ერთად, ეუთოს ერთ-ერთი მთავარი ფასეულობაა. მათ ამის გაკეთება ყოველგვარი უარყოფითი შედეგების გარეშე უნდა შეეძლოთ.
ეს აუცილებელია ეუთოს ინსტრუმენტების ფუნქციონირებისთვის. შეშფოთებული ვართ ქართველი სამოქალაქო საზოგადოების წარმომადგენლების მიმართ ამ კონფერენციაში მათ მონაწილეობასთან დაკავშირებით გამოთქმული კომენტარებით, აგრეთვე, ვარშავის ადამიანური განზომილების კონფერენციის მონაწილე სხვადასხვა უფლებადამცველისგან მიღებული ცნობებით. გვინდა კიდევ ერთხელ ხაზგასმით აღვნიშნოთ, რამდენად მნიშვნელოვანია ეუთოს ღონისძიებებში უსაფრთხო მონაწილეობა, ყოველგვარი საპასუხო ზომების გარეშე“, – განაცხადა შვეიცარიის წარმომადგენელმა.
განცხადებას წინ უძღოდა შალვა პაპუაშვილის ბრალდებები, რომელმაც 7 ოქტომბერს კითხვები დასვა, რა თანხებითა და ვისი დაფინანსებით ჩავიდნენ ვარშავაში ქართული არასამთავრობო ორგანიზაციების წარმომადგენლები, მათ შორის „საფარის“ ხელმძღვანელი ბაია პატარაია და საიას ხელმძღვანელი თამარ ონიანი. პაპუაშვილმა ორგანიზაციები ე.წ. „შავი ფულით“ დაფინანსებაში დაადანაშაულა.
„რა თანხებით დადიან და ვინ აფინანსებს? ჩვენ გამჭვირვალობის რეესტრში მათი ორგანიზაციები და გამჭვირვალობა არ გვინახავს. თუ ამას სახელმწიფოს არ უმხელენ, ეს იმას ნიშნავს, რომ „შავი ფულით“ ფინანსდებიან. ესეც დასტურია იმისა, რომ საქართველოში „შავი ფულით“ სხვადასხვა, მათ შორის ევროპული სტრუქტურებიდან ორგანიზაციების დაფინანსება ხდება“, – განაცხადა შალვა პაპუაშვილმა 7 ოქტომბერს.
5 ოქტომბერს ბაია პატარაიამ ეუთოს კონფერენციაზე საქართველოს წარმომადგენლის გამოსვლა ბანერით – „გაათავისუფლეთ ყველა ქართველი პოლიტიკური პატიმარი“ გააპროტესტა.
„საფარის“ ხელმძღვანელმა, ბაია პატარაიამ, სოციალურ ქსელში დაწერა:
ეუთოს თავმჯდომარე ქვეყანა ამჟამად შვეიცარიაა, იხილეთ მათი მკაცრი განცხადება ქართველ უფლებადამცველებზე ქოცნების (პაპუაშვილ-კობახიძის) თავდასხმების საპასუხოდ. სულ ქცევის კოდექსი წაიკითხეთო ეძახეს, ოღონდ სად იციან ქოცებმა ქცევა?!
შვეიცარიის წარმომადგენელმა კონფერენციის მონაწილეებს ეუთოს ქცევის კოდექსიც შეახსენა და აღნიშნა, რომ უფლებადამცველების უსაფრთხო მონაწილეობა ორგანიზაციის ერთ-ერთი მთავარი ფასეულობაა.
კომენტარები