აშშ-ის კალიფორნიის შტატში 77 წლის ცოლ-ქმარს საკუთარი სიძის მკვლელობა ედება ბრალად. 40 წლის ჯონათან მაკკინსი 26 სექტემბერს, დუბლინის ერთ-ერთი სპორტული კომპლექსის მიმდებარე ტერიტორიაზე ცეცხლსასროლი იარაღით მოკლეს.
დაკავებულები არიან ცოლ-ქმარი, რომლებიც გარდაცვლილის მეუღლის, კანდის ჯანგის, მშობლები არიან.
მოწმეების ინფორმაციით, თავდასხმაში მამაკაცი და ქალი მონაწილეობდნენ. პოლიციის განცხადებით, გამოძიების ფარგლებში მოპოვებულმა სათვალთვალო კამერების ჩანაწერებმა აჩვენა, რომ ორივე ეჭვმიტანილი სროლაში მონაწილეობდა. დაკავებისას ქალს ცეცხლსასროლი იარაღი აღმოაჩნდა, ხოლო მეორე იარაღი მოგვიანებით ავტომობილში იპოვეს.
მკვლელობამდე რამდენიმე დღით ადრე მაკკინსისა და მისი მეუღლის განქორწინებისა და შვილების მეურვეობის საქმეზე სასამართლო განხილვა იყო დაგეგმილი. წყვილს სამი შვილი ჰყავდა და სასამართლო დოკუმენტებიდან ირკვევა, რომ მათი ურთიერთობა ბოლო პერიოდში განსაკუთრებით დაძაბული იყო.
მაკკინსი და მისი მეუღლე ერთმანეთის წინააღმდეგ შემაკავებელი ორდერების მოთხოვნით სასამართლოსაც მიმართავდნენ და ორივე მხარე ერთმანეთის მხრიდან ძალადობის შესახებ აცხადებდა. მაკკინსის საქმეში ასევე ფიგურირებდა ბავშვთან დაკავშირებული სისხლის სამართლის ბრალდებები, რომელსაც ის უარყოფდა.
ამასთან, პროკურატურის მიერ წარდგენილ ბრალდებაში ნათქვამია, რომ მკვლელობა შესაძლოა წინასწარ დაგეგმილი ყოფილიყო – საქმეში შეტანილია განსაკუთრებული გარემოების, „ჩასაფრების გზით“ მკვლელობის, ბრალდებაც. გამოძიების ამ ეტაპზე მკვლელობის ზუსტი მოტივი ოფიციალურად დადგენილი არ არის.
გამოძიება ამ დრომდე გრძელდება და სასამართლოს საბოლოო გადაწყვეტილება ბრალდებულთა დანაშაულის შესახებ ჯერ არ მიუღია.
კომენტარები