ევროკავშირის გაფართოების საკითხებში ევროკომისარმა მარტა კოსმა განაცხადა, რომ მიმდინარე შემოდგომა EU-ს გაფართოების პროცესისთვის მნიშვნელოვანი იქნება და მუშაობა როგორც კანდიდატი ქვეყნების, ისე უშუალოდ ბლოკის მომზადებასაც მოიცავს.
“ეს შემოდგომა გაფართოების შემოდგომა იქნება ორი მიმართულებით: პირველი წევრობისთვის კანდიდატების მომზადებაა, მეორე კი ის, თუ რას ვაკეთებთ EU-ს შიგნით, რათა ამისთვის მოვემზადოთ.” – თქვა კოსმა 4 სექტემბერს დუბლინში, ზოგად საქმეთა საბჭოს არაფორმალური შეხვედრის დაწყებამდე.
კოსის თქმით, 2026 წელი გაფართოების მხრივ უკვე რეკორდულია. მან განმარტა, რომ წელს უფრო მეტი მოლაპარაკების თავი გაიხსნა და დაიხურა, ვიდრე ბოლო 25 წლის რომელიმე ცალკეულ წელს.
ევროკომისარმა ასევე აღნიშნა, რომ ზოგიერთმა კანდიდატმა ქვეყანამ გაწევრიანების შესახებ მოლაპარაკებები შესაძლოა, მიმდინარე ათწლეულის ბოლომდე დაასრულოს.
კოსის მიხედვით, EU ახალი წევრების მისაღებად ოთხ მიმართულებაზე იმუშავებს: გაფართოების გავლენა კავშირის პოლიტიკებსა და წევრ სახელმწიფოებზე, EU-ს შიდა რეფორმები, დემოკრატიისა და კანონის უზენაესობის დასაცავად ახალი გარანტიები და კანდიდატი ქვეყნების ეტაპობრივი ინტეგრაცია სრულ წევრობამდე.
კოსის თქმით, ეტაპობრივი ინტეგრაციის ახალმა ფორმებმა უნდა შეამციროს სხვაობა გაფართოების გეოპოლიტიკურ აუცილებლობასა და დამსახურებაზე დაფუძნებულ პროცესს შორის.
კომენტარები