შეთანხმება ვერ შედგა – ანაკლიაში მიწის მფლობელებს ქონებას მშენებლობისთვის ჩამოართმევენ. ამის შესახებ ინფორმაციას BMG-ი ავრცელებს.
მედიის ცნობით, ქართული ოცნების, ეკონომიკისა და მდგრადი განვითარების მინისტრის, მარიამ ქვრივიშვილი 20 აგვისტოს ბრძანების მიხედვით, ანაკლიის ღრმაწყლოვან პორტთან დამაკავშირებელი საავტომობილო გზის, რკინიგზისა და შესაბამისი ინფრასტრუქტურის პროექტის ფარგლებში 12 222 კვადრატული მეტრი მიწის ნაკვეთის ექსპროპრიაციის პროცედურა დაიწყება.
მინისტრის ბრძანების თანახმად, ექსპროპრიაციის პროცედურის დაწყების საფუძველი გახდა ის, რომ აღნიშნული ქონების ნებაყოფლობით გამოსყიდვაზე მოლაპარაკებების მიუხედავად, შეთანხმება ვერ შედგა.
ბრძანების მიხედვით, ანაკლიის პორტთან დამაკავშირებელი ინფრასტრუქტურის პროექტი აუცილებელი საზოგადოებრივი საჭიროების მქონე პროექტად განისაზღვრა, ხოლო საქართველოს საავტომობილო გზების დეპარტამენტს იმ მიწის ნაკვეთებზე ექსპროპრიაციის უფლების მოსაპოვებლად სასამართლოსთვის მიმართვის უფლებამოსილება მიენიჭა.
BMG-ის ინფორმაციით, ექსპროპრიაციის ფარგლებში ჯამში 12 222 კვ.მ მიწის ნაკვეთი ხვდება: მათგან 605 კვ.მ მდებარეობს ზუგდიდის მუნიციპალიტეტის სოფელ დარჩელში, 1 546 კვ.მ – სოფელ ანაკლიაში, კიდევ 64 კვ.მ – დარჩელში, ხოლო 10 007 კვ.მ – სოფელ კიროვში. ზოგიერთ ნაკვეთზე ექსპროპრიაცია ასევე მოიცავს არსებულ აქტივებს, მათ შორის ღობესა და მრავალწლიან ნარგავებს.
ექსპროპრიაციის შესახებ მინისტრის ბრძანება არ ნიშნავს საკუთრების საბოლოო ჩამორთმევას. დოკუმენტის მიხედვით, საავტომობილო გზების დეპარტამენტმა ექსპროპრიაციის უფლების მოსაპოვებლად სასამართლოს უნდა მიმართოს. ქონების საბაზრო ღირებულებასა და საკომპენსაციო თანხაზე მხარეებს შორის შეუთანხმებლობის შემთხვევაში, საკითხი სასამართლოში განიხილება.
გამოსასყიდი მიწის ფართობი სულ 1.7 მილიონი კვადრატული მეტრია
საავტომობილო გზების დეპარტამენტის ინფორმაციით, ამ ეტაპზე პროექტისთვის 1 720 553 კვ.მ რეგისტრირებული მიწის ნაკვეთის გამოსყიდვის პროცესი მიმდინარეობს.
კომენტარები