თაღლითურ ფინანსურ პირამიდებთან დაკავშირებით სებ–ის განცხადებამ დაბნეულობა შემოიტანა – რომან გოცირიძე

ეროვნული ბანკის ყოფილი პრეზიდენტი, რომან გოცირიძე:

ტრადიციული ფინანსური პირამიდის სიცოცხლის ხანგრძლივობა დაახლოებით 6 თვემდეა. ყველასთვის ცნობილმა რუსულმა პირამიდამ, MMM-მა, 90-იან წლებში სულ რაღაც ექვსი თვე გაძლო და 15 მილიონამდე ადამიანი გააუბედურა. ვინც ჭკვიანი აღმოჩნდა, არ დახარბდა და გარკვეული მოგების მიღების შემდეგ დროულად გამოვიდა სისტემიდან.

უფრო დიდხანს ცოცხლობენ გლობალური ინტერნეტ-პირამიდები-მათ შეიძლება იარსებონ ერთი ან რამდენიმე წელიც კი. თუმცა, კაცობრიობის ისტორიაში არ არსებობს არცერთი პირამიდა, რომელიც საბოლოო კოლაფსს გადაურჩა.

ჩვეულებრივი, ტრადიციული პირამიდების ჩამოშლა მყისიერად არ ხდება და პრობლემები ადამიანმა შეიძლება გარკვეულ ინდიკატორებზე დაყრდნობით შეამჩნიოს. რაც შეეხება ინტერნეტ (კრიპტო) პირამიდებს, ისინი შეიძლება ერთ წამში გაქრნენ-ვებგვერდი და ყველა ანგარიში უბრალოდ აორთქლდეს.

პირამიდა კოლაფსის ფაზაშია, თუ:

-ხდება თანხის გატანის შეფერხება ან დაბლოკვა. ეს არის პირამიდის დასასრულის პირველი და ყველაზე მთავარი ნიშანი.

-სისტემა მომხმარებლებს სთხოვს საკომისიოს, ანგარიშის ვერიფიკაციის ან დეპოზიტის გაზრდის სახით დამატებითი თანხის შეტანას, რათა კუთვნილი ფული გამოიტანონ. ეს ნიშნავს, რომ სქემა უკვე ჩაიშალა და ორგანიზატორები ცდილობენ ხალხს უკანასკნელი თანხები გამოსძალონ.

პირამიდაში ჩართული ბევრი ჩვენი მოქალაქე წერს, რომ ჩადებულ ფულს შემოსავალი მოაქვს. თუ პირამიდა საწყის ეტაპზეა, ეს შესაძლებელია. ეს თამაში რუსულ რულეტკას ჰგავს-თავდაპირველად რევოლვერის დოლურაში 6-დან მხოლოდ 1 ტყვია დევს და მისი დატრიალებისას გადარჩენის ალბათობა მაღალია. თუმცა, რაც უფრო დიდხანს ატრიალებ დოლურას და თამაშში რჩები, გასროლა მით უფრო გარდაუვალი ხდება. ყველა პირამიდა და მასში ბოლომდე შემორჩენილი ფული სწორედ ასე ამთავრებს სიცოცხლეს.