ალეკო ელისაშვილის სასამართლო პროცესი ხმაურით დაიწყო – “მოქალაქეების” ლიდერის გაღიზიანება მოჰყვა მოსამართლე ლელა მარიდაშვილის გადაწყვეტილებას, რომელმაც დაკავებული პოლიტიკოსის შვილს სხდომათა დარბაზი მოკლე შარვლის, ე.წ. შორტის ჩაცმის გამო დაატივებინა.
“ამიკრძალეთ შვილების ნახვა, რომლებიც 9 თვეა არ მინახავს, უნამუსო ხალხი ხართ თავიდან ბოლომდე.
შვილი გამიგდე სასამართლო დარბაზიდან, 9 თვეა არ მინახავს, ადამიანი არ ხარ, შვილები არ გყავს? “- მიმართა მარიდაშვილს ელისაშვილმა.
თბილისის საქალაქო სასამართლოში „ძლიერი საქართველო – ლელოს“ ერთ-ერთი ლიდერის, ალეკო ელისაშვილის მეოთხე სისხლის სამართლის საქმეზე სასამართლო პროცესი რამდენიმე წუთის წინ დაიწყო. .
ცნობისთვის, ალეკო ელისაშვილის წინააღმდეგ საერთო ჯამში, სისხლის სამართლის 4 საქმეა წარმოებული, საიდანაც ერთზე, რომელიც ტერორისტული აქტის მცდელობას გულისხმობს, მსჯავრდებულია და 13 წლით თავისუფლების აღკვეთა აქვს მისჯილი.
ამასთან, პოლიტიკოსს პროკურატურა ტერორისტული აქტის განხორციელებას ედავება. [საუბარია სასამართლოს არქივის შენობაში გაჩენილ ხანძარზე].
დაკავებამდე ელისაშვილს ბრალი წაუყენეს პარტია „ქართული ოცნება – დემოკრატიული საქართველოს“ ერთ-ერთი დამფუძნებლის, ალი ბაბაევის საქმეზეც.
ელისაშვილს ბრალად ედება სასამართლოს უპატივცემულობა – ბრალდების მხარის ცნობით, ელისაშვილმა ერთ-ერთ სასამართლო სხდომაზე პოლიციელს „არაკაცი“ უწოდა. საუბარია შოთა ჭიპაშვილზე, რომელსაც ალეკო ელისაშვილი წამებასა და არაადამიანურ მოპყრობაში ადანაშაულებს.
კომენტარები