“მადლობა საქართველო”– დიუშენის დიაგნოზის მქონე ბავშვების მშობლები მხარდამჭერებს მადლობას უხდიან

ფოტოები – mo se

რუსთაველის გამზირზე დიუშენის კუნთოვანი დისტროფიით დაავადებული ბავშვების მხარდამჭერი „მადლობის მარში“ მიმდინარეობს. აქციის მონაწილეები აცხადებენ, რომ ეს არის ერთიანობის, თანადგომისა და საერთო ძალისხმევით მიღწეული შედეგის აღნიშვნა.

მარშის ორგანიზატორებისა და დაავადებული ბავშვების მშობლების თქმით, მსვლელობა ეძღვნება ყველა იმ ადამიანს, ვინც პროტესტის განმავლობაში მათ გვერდით იდგა და ბავშვების სიცოცხლისთვის აუცილებელი მკურნალობის ხელმისაწვდომობის მოთხოვნას მხარს უჭერდა.

მშობლები განსაკუთრებულ მადლობას უხდიან ილიას სახელმწიფო უნივერსიტეტი-ს სტუდენტებს, რომლებმაც საქველმოქმედო მარათონი გამართეს და ბავშვებისთვის საჭირო ფინანსური რესურსების მობილიზებაში მნიშვნელოვანი წვლილი შეიტანეს.

„მადლობის მარში“ რუსთაველის მეტროს მიმდებარე ტერიტორიიდან დაიწყო და სიმბოლურად მთავრობის ადმინისტრაციასთან დასრულდება.

შეგახსენებთ, რომ მშობლებსა და “ოცნების” ხელისუფლებას შორის გამართული მოლაპარაკებების შემდეგ, მთავრობის გადაწყვეტილებით შეიქმნება სპეციალური სამუშაო ჯგუფი, რომელიც დიუშენის კუნთოვანი დისტროფიით დაავადებული ბავშვების მედიკამენტებით უზრუნველყოფის საკითხზე იმუშავებს.