“4 ივნისს შეკრებასთან დაკავშირებით მნიშვნელოვან ინფორმაციას გაგიზიარებთ” – ნიკა სიმონიშვილი

როგორც იცით, ყოველ დღესთან დაკავშირებით შსს-ში იწერებოდა გაფრთხილება 5 დღით ადრე, როგორც წესი, წინასწარ რამდენიმე დღესთან დაკავშირებით. ბოლო ასეთი გაფრთხილება გაკეთებული იყო 3 ივნისის (დღევანდელის) ჩათვლით.

გარკვეული ობიექტური მიზეზების გამო, შემდგომ დღეებზე გაფრთხილება დაწერილი აღარ იყო. იმისთვის, რომ 5 დღიანი ვადის დაცვის საკითხი არ გაპრობლემებულიყო და რადგანაც არასამუშაო დღეების გამო ამ ვადის დაცვა ვერ ხერხდებოდა, 30 მაისს ელ. ფოსტით გავუგზავნე შსს-ს შეკრებაზე გაფრთხილება, 4, 5 და 6 ივნისის შეკრებებზე. ამ განცხადების ტექსტი კვალიფიციური ელექტრონული ხელმოწერით იყო დამოწმებული, რაც კანონმდებლობის მიხედვით, საჯარო უწყებებთან კომუნიკაციის სრულფასოვანი ფორმაა და სველ ხელმოწერაზე უფრო მეტად სანდოც კია.

ორშაბათს საპატრულოდან მეილი მივიღე, რომ განცხადება ფიზიკურად მიმეტანა, რადგანაც ვერ ხდებოდა ჩემი იდენტიფიცირება. კვალიფიციურ ელექტრონულ ხელმოწერას ჩემს მეტი ვერავინ გამოიყენებს და მას ყველა ადმინისტრაციული ორგანო ენდობა, თუმცა როგორც აღმოჩნდა, შსს-მ ვერ დამაიდენტიფიცირა.

მოკლედ, ორშაბათსვე წავიღე სველი ხელმოწერით განცხადება საპატრულო პოლიციის დეპარტამენტში და ფიზიკურადაც შევატყობინე ორშაბათსვე (1 ივნისს). იქვე ისიც დავუწერე, მეილზე რომ მოგივიდათ წერილი, მართლა მე ვიყავი მეთქი და ეგენიც მივუტანე.

იმის მიუხედავად, რომ გაფრთხილება დროულად იყო გაგზავნილი, დღეს დამირეკეს და შემატყობინეს, რომ 4 ივნისის შეკრებასთან დაკავშირებით, გაფრთხილების ვადის დარღვევის გამო, უარყოფითი პასუხია თქვენს განცხადებაზეო, დასაბუტებულ პასუხს კი წერილობითაც გამოგიგზავნით მისამართზეო (რაც ჯერ არ მიმიღია). იანვარში მსგავსი განცხადება რომ გავუგზავნე, მაშინ დამირეგისტრირეს, ახლა კი თურმე ვეღარ მაიდენტიფიცირებენ.

ცხადია, რომ შსს-ს პრაქტიკა გადასულია სანებართვო სისტემაზე, რაც კონსტიტუციის და ქართული ოცნებისვე დაწერილი კანონის უხეში დარღვევაა, შეკრებაზე უარის თქმის უფლება მათ არ აქვთ.

აქვე იმასაც გეტყვით, რომ 5 და 6 ივნისზე ვადა დაცულად ჩათვალეს და ეს ვებზეც გამოქვეყნებულია, 4 რიცხვზე მიიჩნევენ მხოლოდ ვადას დაუცველად.

ამის შესახებ მინდოდა ყველასთვის შემეტყობინებინა, რადგანაც ძალიან ბევრ ადამიანთან მიმართებით სისხლისსამართლებრივი დევნის რისკი არსებობს იმ პირებზე, ვისაც ადმინისტრაციული პატიმრობა უკვე ჰქონდათ შეფარდებული.

პირადად ჩემს პოზიციას კი რაც შეეხება, გეტყვით, რომ არავის ნებართვა არ მჭირდება შეკრებისთვის და რამის გასაპროტესტებლად, დღესაც ვიქნები რუსთაველზე და ხვალაც აუცილებლად.