გათავისუფლებულმა თანამშრომელმა „ახალქალაქის საზოგადოებრივი ჯანდაცვის ცენტრს” სასამართლო დავა მოუგო – ინფორმაციას საია ავრცელებს. ახალგაზრდა იურისტთა ასოციაციის ცნობით, ახალქალაქის რაიონულმა სასამართლომ დააკმაყოფილა საიას სარჩელი და ბათილად ცნო ცენტრის დირექტორის ბრძანება ნ.დ.-ს სამსახურიდან გათავისუფლების შესახებ. მოპასუხეს დაეკისრა უკანონო გათავისუფლების დღიდან გადაწყვეტილების აღსრულებამდე იძულებითი განაცდურის ანაზღაურება.
ამასთან, ვინაიდან სასამართლომ მოსარჩელის იმავე ან ტოლფას პოზიციაზე აღდგენა შეუძლებლად მიიჩნია, მოპასუხეს მის სასარგებლოდ 3000 ლარის ოდენობით კომპენსაციის გადახდაც დაეკისრა.
საია სასამართლოში იცავდა ნ.დ.-ს ინტერესებს, რომელიც ა(ა)იპ „ახალქალაქის საზოგადოებრივი ჯანდაცვის ცენტრიდან“ მრავალი წლის მუშაობის შემდეგ, 2025 წლის 1 იანვრიდან დისკრიმინაციულად გაათავისუფლეს.
საქმე განსაკუთრებით საყურადღებოა იმ ფონზე, როდესაც საქართველოში საჯარო და მუნიციპალიტეტის მიერ დაფუძნებულ ორგანიზაციებში დასაქმებულთა შრომითი უფლებების დაცვის კუთხით სისტემური პრობლემები კვლავ იკვეთება. საიას შეფასებით, 2025 წლიდან განსაკუთრებით ინტენსიური გახდა კრიტიკულად განწყობილი საჯარო მოხელეებისა და სახელმწიფო თუ მუნიციპალურ სექტორში დასაქმებული პირების სამსახურებიდან გათავისუფლების პრაქტიკა, რასაც თან ახლდა მათი შრომითი გარანტიების შესუსტება და შრომითი უფლებების დარღვევის გაზრდილი რისკები”, – ნათქვამია საიას განცხადებაში.
კომენტარები