“აშშ-ს სურვილი ნათელია, ესაა პოლიტიკური დიალოგის და შეთანხმებების გზით სიარულის დაწყება”– ირაკლი მელაშვილი

ჩემი აზრით, ამერიკის საელჩოს ამ ფორმით გაკეთებული განცხადების მიზანი იყო, რომ ხელისუფლებისა და ოპოზიციისთვის ამერიკელების მხრიდან ამ შეხვედრებზე გამოთქმული მოსაზრებების საზოგადოებისთვის არასასურველი ინტერპრეტაციით მიწოდების რაც შეიძლება ნაკლები შესაძლებლობა დაეტოვებინა. ნუ, თავისთავად რამდენად მნიშვნელოვანია ამერიკული დიპლომატების ვიზიტის თაობაზე საქართველოს მოსახლეობის სწორად ინფორმირება და რამდენად ენდობიან ქართული მხარის შესაძლო ინტერპრეტაციებს, ეს ამ განცხადებიდანაც ჩანს!

აშშ-ს დელეგაციამ შეხვედრებზე ხაზი გაუსვა პრეზიდენტ ტრამპის ადმინისტრაციის მხრიდან საქართველოსთან თანამშრომლობის ინტერესს, ოღონდ არა ყველაფრის ფასად. ორივე მხარეს უთხრეს რომ პოლიტიკური პროცესის დაწყებას ელოდება, რომელშიც ხელისუფლება და ოპოზიცია უნდა იყოს ჩართული.

– “მდგრადი სტრატეგიული პარტნიორობისთვის საჭირო იქნება უწყვეტი პროგრესი იმ პირობების უზრუნველყოფით, რომელიც საქართველოს სანდო პარტნიორად აქცევს, მათ შორის, ამერიკული ბიზნესისთვის ხელსაყრელი ბიზნესგარემოსა და სტაბილური შიდა პოლიტიკური კლიმატით, რაც ხელს უწყობს ოპოზიციის ჩართულობას დელეგაციამ განიხილა კონკრეტული ნაბიჯები, რომელთა გადადგმაც საქართველოს მთავრობას შეუძლია და დაგვეხმარება ამ მიზნის მიღწევაში.”

აბსოლუტურად გასაგებია, რა უთხრეს ამერიკელებმა ოპოზიციასაც, მათ შორის პრალამენტის ბოიკოტის საკითხზეც – “დელეგაციამ მათ (ანუ, ოპოზიციას ) გაუზიარა შეერთებული შტატების პოზიცია საქართველოს დემოკრატიულ ინსტიტუტებში ოპოზიციის მონაწილეობის შესახებ. ფუნქციონალური დემოკრატია საჭიროებს პოლიტიკურ ოპოზიციას, რომელიც სახელმწიფო ინსტიტუტებთან ურთიერთობს იმ მოქალაქეების ინტერესების წარმოსაჩენად, რომლებმაც მას ხმა მისცეს. პოლიტიკური სტაბილურობა და ოპოზიციის რეალური წარმომადგენლობა იმ ფაქტორებს შორისაა, რომელიც საქართველოს ამერიკული ინვესტიციებისთვის, უსაფრთხოების სფეროში თანამშრომლობისა და გრძელვადიანი სტრატეგიული პარტნიორობისთვის სანდო პარტნიორად აქცევს.”

ახლა რა თქმა უნდა ხელისუფლებას და ოპოზიციას ისევ შეუძლია ხელი ერთმანეთისკენ გაიშვიროს და მუდივად იმაზე ისაუბროს თუ რა აქვს მოწინააღმდეგე მხარეს გასაკეთებელი. აშშ-ს სურვილი ნათელია, ესაა პოლიტიკური დიალოგის და შეთანხმებების გზით სიარულის დაწყება. ვისაც წაკითხულიდან აზრის გამოტანა შეუძლია, ამ ციტატებიდან ადვილად მიხვდება, რომ ამერიკელები პირველ რიგში ხელისუფლებისგან, მაგრამ ასევე ოპოზიციისგანაც “ფუნციონალური დემოკრატიის” მისაღწევად თანამშრომლობას და შედეგების დადებას ელოდებიან. განცხადებაში შემთხვევით არ იყო ნახსენები ამერიკული მხარის ოპოზიციასთან შეხვედრაზე ბოიკოტის საკითხზე საუბარი და არჩევით ორგანოებში ოპოზიციის მონაწილეობის აუცილებლობაზე ხაზგასმა. ჩემი აზრით ეს განცხადება არაორაზროვანი მესიჯია, რომელიც ოპოზიციას ბოიკოტის, “ხელისუფლებას არ დაველაპარაკები”, “სანამ ესენი არ წავლენ არჩევნებს აზრი არ აქვს” და ასეთი გზავნილებისგან თავის განებებას ურჩევს! ხელისუფლებას კი ძალიან მტკიცედ მოუწოდებს დემოკრატიული რეფორმების გატარებისაკენ, რომელმაც უნდა მოიტანოს პოლარიზაციის დასრულება და ქვეყნის სტაბილური განვითარება.