მოწმეები ადასტურებენ, რომ ქრთამს გვანცელაძე გადასცემდა ლილუაშვილს – პროკურატურა

გრიგოლ ლილუაშვილის საქმის პროკურორი ამბობს, რომ ბაღების ძარცვის ეპიზოდზე დაკითხულნი არიან ბაღის სააგენტოს თანამშრომლები, რომლებმაც დაადასტურეს, რომ ქრთამის სახით თანხა მიდიოდა ჯერ საბავშვო ბაგა-ბაღების მართვის სააგენტოს ყოფილ დირექტორთან, კახა გვანცელაძესთან და მისგან გადაეცემოდა სწორედ სუს-ის ყოფილ შეფს, გრიგოლ ლილუაშვილს.

ამ რიგით მეწარმეებს, რომლებიც გარკვეულ სარემონტო სამუშაოებს ასრულებდნენ თუ გარკვეული ინვენტარი შეჰქონდათ ბაღებში, პირდაპირი კომუნიკაცია გრიგოლ ლილუაშვილთან ვერ ექნებოდათ, ეს ხომ აბსურდი არის. თუმცა, ბრალდების მხარე ვალდებული არის, როცა ადამიანს ედავება ქრთამის აღებას, სრული სქემა დაადასტუროს სასამართლოს წინაშე მტკიცებულებებით, ამიტომ როცა ჩვენ ამ მეწარმეებს ვკითხავთ, ბუნებრივია ისინი ამბობენ, რომ არ იციან გრიგოლ ლილუაშვილის შემხებლობა ამ ეპიზოდთან, მაგრამ ეს არ ნიშნავს, რომ ეს არ არის პირდაპირი ხასიათის მტკიცებულება. ადვოკატები უბრალოდ ამით ცდიან ფონის შექმნას, თითქოსდა მოწმეები არაფერს არ ადასტურებენ. თუმცა, ჩვენ დავკითხეთ ბაღების ეპიზოდზე ის მოწმეები, სააგენტოს ის თანამშრომლები, რომლებიც შუამავლები იყვნენ და რომლებიც ადასტურებენ, რომ ქრთამის სახით წამოღებული თანხა მიდიოდა გვანცელაძესთან და მათთვის კარგად იყო ცნობილი, რომ გვანცელაძისგან ეს გადაეცემოდა გრიგოლ ლილუაშვილს. თუმცა, რა თქმა უნდა, ამ მომწეებს პირადი და ყოველდღიური კავშირი გრიგოლ ლილუაშვილთან არ ჰქონდათ და ვერ ექნებოდათ”, – ახადებს პროკურატურის წარმომადგენელი. 

როგორც პროკურატურის განცხადებიდან ჩანს, ის პირები, რომლებიც შუამავლები იყვნენ ქრთამის საქმეში, მოწმეებად ჰყავთ კვალიფირებულნი და მათ წინააღმდეგ სამართლებრივი დევნა არ ხორციელდება.

ლილუაშვილი პროკურატურამ გასული წლის დეკემბერში დააკავა. მას ბრალი ედება სისხლის სამართლის კოდექსის 338-ე მუხლის მე-2 ნაწილის ,,გ’’ ქვეპუნქტით და მე-3 ნაწილის ,,ე’’ ქვეპუნქტით, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.

რაც შეეხება საბავშვო ბაგა-ბაღების მართვის სააგენტოს ყოფილ დირექტორს კახაბერ გვანცელაძეს, მას „ატკატების“ აღებისთვის ბრალი გასული წლის დეკემბერში წარუდგინეს.