შალვა პაპუაშვილი საქართველოში გერმანიის ელჩის, პეტერ ფიშერის განცხადებას, სადაც ის, მის მიმართ პაპუაშვილის განცხადებებს ცილისმწამებლურს უწოდებს, ეხმაურება და თავიდან ამბობს, რომ კომენტარისთვის “არ აქვს ხალისი”, თუმცა, შემდგომ, საკმაოდ ვრცლად პასუხობს, როგორც თქვა, უხალისოდ:
„ხალისი არ მაქვს ამ ადამიანის მტრულ თავდასხმებზე რაიმე კომენტარი გავაკეთო. თუ საჭიროდ ჩათვლის საგარეო საქმეთა სამინისტრო, შეუძლია, დაიბაროს და შესაბამისი გასაუბრება ჰქონდეს. ვიცით, როდესაც ის მისმა სამინისტრომ გაიწვია კონსულტაციებზე ბერლინში, ის დაბრუნდა, საქართველოში დააბრუნეს საგარეო საქმეთა სამინისტროსთან იმ შეთანხმებით და პირობით რომ საქართველოზე ასეთ თავდასხმებს არ ექნებოდა ადგილი. ეს პირობა, სამწუხაროდ, დარღვეულია როგორც ელჩის მხრიდან და ასევე ვხედავთ გერმანიის საგარეო საქმეთა სამინისტრო ამ მხრივ ამ პირობას არ იცავს. იმედი მაქვს, საგარეო საქმეთა სამინისტროს ექნება სათანადო რეაგირება, როდესაც საქართველოში აკრედიტებული უცხო ქვეყნის წარმომადგენელი ასეთი მტრული თავდასხმებით გამოირჩევა სახელმწიფოს და უმაღლესი პოლიტიკური თანამდებობის პირების მიმართ.
პეტერ ფიშერი რამდენიმე კვირაში დატოვებს საქართველოს, ვიცით, რომ ის აქედან პენსიაზე გადის პირდაპირ, რაც კარგია იმ მხრივ, რომ ვერ დააზიანებს ვერცერთ სხვა ერს, როგორც სამწუხაროდ, შეძლო ეს ქართულ-გერმანული ურთიერთობაში“
ცნობისთვის, ფიშერმა, რომელიც ხშირადაა ქართული ოცნების განცხადებების მთავარი ადრესატი, განაცხადა
„ევროკავშირი 101. როგორ არ უნდა შეხვიდეთ ევროკავშირში: ჩადიხართ ევროკავშირის ერთ წევრ სახელმწიფოში და მეორე წევრის ელჩს ცილს სწამებთ. ევროკავშირი თანამშრომლობასა და სოლიდარობას წარმოადგენს. მაგალითი: გერმანია სლოვაკეთის #1 სავაჭრო პარტნიორია, რაც ინვესტიციებისა და მრეწველობის ცენტრალური ნაწილია. ღრმა ურთიერთდამოკიდებულებას სლოვაკეთის ეკონომიკისთვის სტრატეგიული მნიშვნელობა აქვს“
კომენტარები