იმედი მაქვს, რომ 2028 წელს მექნება შესაძლებლობა აზერბაიჯანს ვეწვიო, როდესაც იქ ევროპული პოლიტიკური გაერთიანების სამიტი გაიმართება, – ამის შესახებ სომხეთის პრემიერ-მინისტრმა ნიკოლ ფაშინიანმა ევროპული პოლიტიკური გაერთიანების მერვე სამიტის პლენარულ სხდომაზე განაცხადა.
მისი თქმით, პირველი შემთხვევაა, როდესაც აზერბაიჯანის პრეზიდენტი სომხეთში გამართულ ღონისძიებაში მონაწილეობს, თუმცა დისტანციურად.
ფაშინიანმა დასძინა, რომ სომხეთმა და აზერბაიჯანმა ევროპული პოლიტიკური გაერთიანების სამიტების მასპინძლობაზე ერთმანეთის კანდიდატურებს მხარი დაუჭირეს.
ამასთან, სომხეთის პრემიერმა ხაზი გაუსვა, რომ ერევანში მიმდინარე სამიტში მონაწილეობს თურქეთის ვიცე-პრეზიდენტი და რომ ეს პირველი თურქეთის ვიცე-პრეზიდენტია, რომელიც სომხეთს ეწვია.
მისი თქმით, სამიტი მნიშვნელოვანია საერთაშორისო კონტექსტის გათვალისწინებით, განსაკუთრებით ახლა, როდესაც მსოფლიო მრავალი მზარდი გამოწვევის წინაშე დგას — უკრაინიდან შუა აღმოსავლეთამდე.
ეს სამიტი მნიშვნელოვანია საერთაშორისო კონტექსტის გათვალისწინებით, განსაკუთრებით ახლა, როდესაც მსოფლიო მრავალი მზარდი გამოწვევის წინაშე დგას — უკრაინიდან შუა აღმოსავლეთამდე. მე მაქვს იმედი, რომ ჩვენი დისკუსიებისა და გადაწყვეტილებების შედეგად, ეს სამიტი შეიძლება ისტორიულიც კი გახდეს საერთაშორისო მშვიდობისა და სტაბილურობისთვის, – განაცხადა ფაშინიანმა.
კომენტარები