სახელმწიფო აუდიტის სამსახურმა „საქართველოს ნავთობისა და გაზის კორპორაციის“ მიერ 2022-2023 წლებში განხორციელებული საფინანსო-ეკონომიკური საქმიანობის მოქმედ კანონმდებლობასთან შესაბამისობის აუდიტი ჩაატარა.
ანგარიშის მიხედვით, აუდიტის შედეგად გამოვლინდა, რომ 2022-2023 წლებში 7,184,584 ლარის ოდენობით გაცემული პრემია არ არის სათანადოდ დასაბუთებული!
ასევე, გამოვლინდა კორპორაციის მენეჯმენტის პრემირების წესის დამტკიცების ხარვეზები:
კორპორაციის მენეჯმენტის პრემირება განხორციელებულია კანონმდებლობის მოთხოვნების დაუცველად, პარტნიორთან შეთანხმების გარეშე. კორპორაციის მენეჯმენტზე 2022 წელს გაცემულია 725,106 ლარის პრემია.
2023 წელს კორპორაციის მენეჯმენტის პრემირების წილის მმართველთან შეთანხმების საკითხი არ რეგულირდებოდა, აღნიშნულ პერიოდში გაცემულია 945,706 ლარი,” – წერია ანგარიშში.
გარდა ამისა, აუდიტის სამსახურმა ვერ იპოვნა მტკიცებულება შტატგარეშე თანამშრომლების მიერ შესრულებული სამუშაოს, ასეთი 117 ადამიანია და უწყება ვერ ამბობს, რისთვის გადაეცათ მათ ანაზღაურება.
2022 წელს ─ 53, ხოლო 2023 წელს 64 შტატგარეშე თანამშრომელზე არ არის დადოკუმენტირებული და აღრიცხული შესრულებული სამუშაოები, რაც ქმნის სახსრების არამართლზომიერი გამოყენების რისკებს,” – აღნიშნულია დოკუმენტში.
კიდევ ერთი დარღვევა, რაც აუდიტის სამსახურმა იპოვნა, წინა ორზე მეტად უცნაურია, რბილად რომ ვთქვათ, უწყება ამტკიცებს, რომ ერთი და იმავე პოზიციაზე დასაქმებულ პირებს, რომლებიც იდენტურ სამუშაოებს ასრულებენ, სხვადასხვანაირად უხდიან ხელფასს:
დეპარტამენტებში ერთსა და იმავე პოზიციაზე დასაქმებულ თანამშრომლებზე განსაზღვრული განსხვავებული სახელფასო განაკვეთები, მაშინ როდესაც შესასრულებელი სამუშაო იდენტურია, ვერ უზრუნველყოფს სახელფასო პოლიტიკის გამჭვირვალობას და ქმნის შრომის არასამართლიანი ანაზღაურების შესაძლებლობას,” – ნათქვამია ანგარიშში.
კომენტარები