,, ფასების ზრდა რომ არ გაგრძელდეს, უნდა დაწესდეს ფასების ზედა ზღვარი და აქციზის გადასახადი განახევრდეს” – თაზო დათუნაშვილი

,,ლელოს” წევრის, თაზო დათუნაშვილის თქმით, ამ პრობლემის მოსაგვარებლად საჭიროა, რომ დროებითი ღონისძიებით, აქციზის გადასახადი განახევრდეს, ფასებზე კი ზედა ზღვარი დაწესდეს.

“როგორც ვამბობდით, უკანასკნელი თვეების განმავლობაში, მას შემდეგ, რაც ხელისუფლებამ დაიწყო უგუნური პოლიტიკა ფასებთან მიმართებით და ძალადობრივი დამოკიდებულება ბიზნესთან, რომ ეს ყველაფერი უკუშედეგს გამოიწვევდა, ასეც მოხდა. კიდევ ერთი ინდექსი ემატება საქსტატის სასურსათო მონაცემების ზრდას, ეს არის საქართველოში პროდუქციის წარმოების ინდექსი, რომელიც აგრეთვე გაიზარდა. ჩვენს ქვეყანაში აბსოლუტურად ყველა პროდუქტის წარმოება, ფაქტობრივად, გაზრდილია. ეს არის მარტის მონაცემები და ამ ყველაფერს დაემატება კიდევ საწვავის ფასის ზრდა შემდეგ თვეებში და კატასტროფულ მონაცემებამდე მივალთ. ერთი მხრივ, უგუნური პოლიტიკა და მეორე მხრივ, საწვავის ფასის ზრდასთან მიმართებით უმოქმედობა ქართული ბიზნესისთვის ძალიან მძიმე და სავალალო შედეგებს გამოიწვევს.

კერძოდ, დამუშავებული მრეწველობის პროდუქციაზე ფასი გაიზარდა 5%-ით, რაც მთლიანი ინდექსის ზრდაზე 4.03%-ით ახდენს გავლენას, კვების პროდუქტებზე 7.8%-ით და სასმელ პროდუქტებზე 6.2%-ით არის ზრდა. საქსტატის მიერ გამოქვეყნებული სამრეწველო პროდუქციის მწარმოებელთა ფასების ინდექსის მიხედვით, წინა წლის შესაბამის თვესთან შედარებით სახეზეა ინდექსის 6.5%-ით ზრდა, ხოლო, წინა თვესთან შედარებით 1.5%-ით. აღსანიშნავია ჯგუფში შემავალი ფასების ზრდა – სასმელებზე და რაფინირებულ ნავთობზეც, ანუ საწვავზეც.

საწვავის გარდა, მოგეხსენებათ, რომ ელექტროენერგიის საფასური პირველი აპრილიდან გაიზარდა 33%-ით, ანუ შემდეგ თვეს უნდა ველოდოთ ნეგატიურად კიდევ დაკორექტირებას ამ ინდექსის. მთელი ამ თვეების განმავლობაში ვამბობდით, რომ შეწყვიტეთ ეს მავნებლობა, ფასების კომისიები, სუს-ის შევარდნები სხვადასხვა ორგანიზაციაში. ამ ყველაფრის სათავეში დგას ირაკლი კობახიძის, ამ ქვეყნის პრემიერმინისტრის უგუნური ინიციატივა, რომ ეს პროცესი დაეწყო, რასაც კასკადურად მოჰყვა ის მასკარადი, რომელსაც ახლა ვუყურებთ მათ შორის პარლამენტში. პირადად ირაკლი კობახიძემ უნდა აიღოს პასუხისმგებლობა ამ ქვეყანაში იმაზე, რომ საქართველოს მოქალაქეების ცხოვრება ბევრად უფრო გაძვირდა, ვიდრე ეს იყო მანამდე, სანამ ეს უბადრუკი კომისიები შეიქმნებოდა.

გამოსავალი იმისთვის, რომ ფასების ზრდა არ გაგრძელდეს, არსებობს, ეს გამოსავალი არის – დროებითი ღონისძიებით განახევრდეს აქციზის გადასახადი, დაწესდეს ფასების ზედა ზღვარი. ამ ორიდან ერთ-ერთიც კი იქონიებს ეფექტს, რომელიც საქართველოს მოქალაქეების ჯიბეს დააზღვევს უფრო მეტი გაღარიბებისგან. იმოქმედეთ და კიდევ ერთხელ ვამბობ, პასუხისმგებლობა უნდა აიღოს კობახიძემ, რადგან მთელ ამ ავანტიურაზე პასუხისმგებლობა ეკისრება სწორედ მას, რომელმაც წამოიწყო ეს პროპაგანდისტული კამპანია, რომელიც კრახით მთავრდება”