“დაეგდე მანდ!” – სააკაშვილი და ნოღაიდელი პროცესზე ერთმანეთს დაუპირისპირდნენ და მათი გაშველება მანდატურებს მოუწიათ –

საქართველოს მესამე პრეზიდენტსა და ყოფილ პრემიერ-მინისტრს შორის სასამართლო პროცესზე მწვავე სიტყვიერი დაპირისპირება მოხდა. მიხეილ სააკაშვილმა მოწმის სახით დაკითხულ ზურაბ ნოღაიდელს არაერთი კითხვა დაუსვა და მისი პოლიტიკური ნაბიჯები გააკრიტიკა.

სააკაშვილი პროცესზე პროკურატურის ბრალდებებსაც გამოეხმაურა და განაცხადა, რომ საქმე პოლიტიკურად მოტივირებულია. მან ასევე კითხვები დასვა ბადრი პატარკაციშვილისა და მისი გარემოცვის შესაძლო კავშირებზე რუსეთთან, ასევე ზურაბ ჟვანიას გარდაცვალების გარემოებებზე.

„მინდა მოგმართოთ პროკურატურას და სასამართლოს, რომელსაც არ ვცნობ, მაგრამ ამას საზოგადოებასთან მისამართად ვიყენებ. დღეს რა მოისმინეთ, ისეთი ამ ჩვენებაში, რის გამოც ამის უკან უნდა ვიჯდე? დღესავით ნათელია, რომ თავიდან ბოლომდე ფარცხალაძის მიერ დაწერილი და შეთითხნილი ბრალია.

ზურა ამბობს, რომ ჩემი კომპეტენცია იყო საგანგებო მდგომარეობის გამოცხადება, ამას ვადასტურებ. არ ვადასტურებ, რომ ჯარი ქუჩაში იყო წესრიგის დასამყარებლად გამოყვანილი, ეს არის სიცრუე. ჯარი იყო, რადგან მტრისთვის დაგვენახებინა, რომ საქართველო ცოცხალია და თავის თავის დაცვა შეუძლია. ზურა, მინდა გკითხო, პატარკაციშვილზე როცა საუბრობ, იცოდი, თუ არა რომ ის მჭიდროდ იყო დაკავშირებული რუსეთთან?[…] მოიცა, პატარკაციშვილის ფული ხომ იყო რუსული წარმოშობის, მისი დაცვის უფროსი ხომ იყო „ეფესბეს“ აგენტი?“ – მიმართა მან ნოღაიდელს.

დაპირისპირება განსაკუთრებით გამწვავდა მაშინ, როდესაც სააკაშვილმა ნოღაიდელს რუსეთის საკითხზე მიმართა:

პუტინთან იყავი თუ არა რუსეთში შეხვედრაზე? მას შემდეგ, რაც საქართველოში შემოვიდა, ტერიტორიების ანექსია მოახდინა, უამრავი ადამიანი დახოცა? ამის შემდეგ შენ თვითონ გადაწყვიტე მტერთან ჩასვლა და თავის დახრა? აბა, პუტინს „ეკაჩავე“, „ებლატავე“, თუ მოუწოდე საქართველო არ დაეპყრო? შეხედეთ ამ მოღალატეს, პუტინთან ჩავიდა. აბსოლუტური ნაძირალა. დაასმინა საქართველო რუსეთთან და ასეთმა ხალმა გაყიდა საქართველო და მიგვიყვანა ამ მდგომარეობამდე, ის, ვინც არ იცის თავმოყვარეობა, ეროვნული ღირსება, პატიოსნება. ამ მოღალატესთან მეტი სალაპარაკო არ მაქვს და ვტოვებ სასამართლოს. ეს არის რუსეთის, პუტინის მიერ მოწყობილი ვითომ სასამართლო ჩემს გასამართლებლად, ერთი რუსი მოწმე აგერ დგას და მეორე რუსის დაწერილი ბრალით მასამართლებენ“, – განაცხადა სააკაშვილმა.

სხდომაზე ვითარება რამდენჯერმე დაიძაბა — მხარეებს შორის სიტყვიერი შელაპარაკება ფიზიკურ დაპირისპირებამდეც კი მივიდა, რის გამოც პროცესში მანდატურის სამსახურის ჩარევა გახდა საჭირო. საბოლოოდ, სააკაშვილმა სხდომათა დარბაზი დატოვა, ხოლო მოსამართლეთა კოლეგიამ პროცესის მონაწილეები წესრიგის დაცვისკენ გააფრთხილა.