“არსებობს მოსაზრება, რომ მეუფე იობის წინააღმდეგ კულუარულად მუშაობენ” – გამზარდია

პოლიტიკური ფილოსოფიის დოქტორი, პროფესორი, არჩილ გამზარდია:

✅️ 3 აპრილის სინოდზე შესაძლოა შეიქმნას ფორმალური საფუძველი, რომ მეუფე ისაიას და მეუფე დანიელს აეკრძალოს პატრიარქობის კანდიდატურის დაყენება, თუმცა არც იმას გამოვრიცხავ, რომ მოსაყდრემ პირიქით, პოზიტიური პოზიციონირება მოახდინოს და ერთიანობის და ჰარმონიზირების ელემენტი შეიტანოს სინოდის ერთიანობის, მღვდელმთავრებისთვის ეთიკური კონკურენციის პირობების შექმნის გზით, რადგან თავად მიტროპოლიტ შიოს სჭირდება პოზიტიური პოზიციონირება სინოდის წევრებთან.

✅️ თუ მიტროპოლიტი შიო მოახერხებს მიტროპოლიტების ისაიასთვის და დანიელისთვის ხელის შეშლას, ამით კიდევ უფრო გააძლიერებს მიტროპოლიტ იობს, როგორც კონკურენტს. თუმცა არსებობს მოსაზრება იმის შესახებაც, რომ მიმდინარეობს მეუფე იობის წინააღმდეგ კულუარული მუშაობა და შესაძლოა სამომავლოდ, მან საერთოდაც არ დააყენოს კანდიდატურა სავარაუდოდ უსაფრთხოების რისკებიდან გამომდინარე.

✅️ თუ სინოდში მოსაყდრე ახლავე წარმოჩინდება როგორც მდევნელი და ამკრძალველი, სინოდის წევრებისათვის ცხადი გახდება, რა დევნის რეჟიმში შეიძლება აღმოჩნდნენ მოსაყდრის გაპატრიარქების შემთხვევაში და ეს მოსაყდრეს ახლა არ უნდა სჭირდებოდეს, თუმცა თუ ის უზრუნველჰყოფს, რომ არც ერთი რეალური კონკურენტი არ აღმოჩნდება კანდიდატი, მაშინ პროცედურა მისთვის წარმატებულად, მარტივად და რიტუალურად ჩაივლის.

✅️ ნებისმიერ შემთხვევაში, 3 აპრილის სინოდის სხდომა იქნება ერთგვარი მოთელვა ძალთა დომინაციის დემონსტრაციისათვის, რაც არსებითი წინაპირობა იქნება პატრიარქობის არჩევნებთან მიმართებაში.

✅️ მიტროპოლიტ შიოს მაღალი ორგანიზაციული, ადაპტაციის და ადმინისტრირების უნარები გააჩნია და ეს აჩვენა, პატრიარქის გარდაცვალების მესამე დღესვე გამართულ სინოდის სხდომაზე, სადაც პირველ რიგში პატრიარქის გარდაცვალებით დეზორიენტირებულ სინოდს დაამტკიცებინა თავისი მოსაყდრეობა, რომ გადაყენების რისკები არ ჰქონოდა. შესაძლოა, ახლაც, სანამ სხვა შესაძლო კანდიდატები ნაკლებად ცდილობენ ერთმანეთში შეთანხმებას, რა ფორმით იკონკურენტებენ ან ითანამშრომლებენ ერთმანეთთან, მოსაყდრემ კვლავ დაასწროს და პროცესი სათავისოდ წარმართოს.

მოცემული სტატუსები მხოლოდ ჰიპოთეტური დამოკიდებულებებია ზოგადი ტენდენციებიდან და მოცემულობებიდან გამომდინარე.

“სურდა თუ არა პატრიარქს მიტროპოლიტი შიო მომავალ პატრიარქად?” – არჩილ გამზარდია