“ივანიშვილსაც ყურებს დავაჭრი…” – ვალერიანე ქოჩიაშვილი

19 მარტს რუსულ პროპაგანდისტულ მედიაში გავრცელდა ინფორმაცია, რომ ოკუპირებული დონეცკის რესპუბლიკასა და საქართველოს შორის გაფორმდა ხელშეკრულება ქვანახშირისა და ლითონის ექსპორტის შესახებ.

ოკუპირებული დონეცკის მაღალჩინოსანმა თქვა, რომ უკვე გაფორმებულია ხელშეკრულება ქართულ კომპანია “George Oil Limited”-თან, რომლის ხელმძღვანელიც ბიზნესმენი ვალერიანე ქოჩიაშვილია.

„ტვ პირველმა“ ვალერიან ქოჩიაშვილს ჰკითხა, როგორ აპირებს ის შეთანხმების ამოქმედებას იმ პირობებში, როდესაც უკრაინის ოკუპირებული ტერიტორიებიდან წიაღისეულის შემოტანა სანქციების დარღვევას ნიშნავს:

 „ძალიან კარგი შეთანხმება მაქვს, გადასარევი შეთანხმება მაქვს, ყველას რომ გაუხარდება, ისეთი შეთანხმებაა და წამოვიღებთ იქიდან რაც დაგვჭირდება საქართველოს – კამფეტებს, რუსულ პრიანიკებს, ყველაფერი კარგად იქნება, ნუ ნერვიულობთ თქვენ.

ფულს წავიღებ და წამოვიღებ…გავაფრთხილებთ „ოცნებას“, რომ დაგვეხმარონ, თორემ მაგათ ყურებას დავაჭრი, ივანიშვილსაც ყურებს დავაჭრი…

რამდენი ქვანხშირი გაქვთ ტყიბულში? რა შახტები გაქვთ? ამერიკას ეყოფა? მე ამერიკაში უნდა გადავაგზავნო იქიდან. მე ხელშეკრულება მაქვს ამერიკასთან და ამერიკა ხომ არ არის ოკუპანტი? ტრამპმა შემოიტანე და ჩამოგატანინებო“, – ამბობს ქოჩიაშვილი „ტვ პირველთან“.

ვალერიანე ქოჩიაშვილმა 2025 წლის მაისში ბათუმში მყოფ გერმანიის ელჩს და მის ცოლს ჯერ სიტყვიერი შეურაცხყოფა მიაყენა, შემდეგ კი ვიდეო ჩაწერა, სადაც პეტერ ფიშერს ფიზიკური ანგარიშსწორებით დაემუქრა.

ტიკტოკზე გამოქვეყნებულ ვიდეოში ქოჩიაშვილმა თქვა, რომ გერმანიის ელჩს საქართველოში არეულობა უნდა.

ქოჩიაშვილი სიტყვიერი შეურაცხყოფისთვის 1000 ლარით დააჯარიმეს.