“ბრიტანულ-ქართული აკადემიის” გარშემო მიმდინარე დავის საზოგადოებრივი მინიტორინგის კონტექსტში, ჩვენი ყურადღება მიიპყრო ნათია ჯანაშიას და მისი მეუღლის მენეჯმენტის პერიოდში, აკადემიის კუთვნილი თანხებიდან 4 მილიონი აშშ დოლარის გაფლანგვა-დატაცების ფაქტებმა“, – ამის თაობაზე, მედიასთან საუბრისას, ყურადღება გაამახვილა “ახალგაზრდა ფინანსისტთა და ბიზნესმენთა ასოციაციის” – აფბას ხელმძღვანელმა, გიორგი კაპანაძემ. შეგახსენებთ, აფბა აღნიშნული დავის საზოგადოებრივ მონიტორინგს ახორციელებს.
მისი თქმით, საჯარო წყაროებში არსებული და მხარეთა მიერ გავრცელებული ინფორმაციის ანალიზის შედეგად გამოიკვეთა, რომ ნათია ჯანაშიას და მისი მეუღლის მენეჯმენტის პერიოდში, სავარუადოდ, მითვისებულია აკადემიის კუთვნილი 4 მილიონი დოლარი. დაინტერესებულ საზოგადოებას შევახსენებთ, რომ ნათია ჯანაშია დირექტორად 5 წლის განმავლობაში „საქართველოს განათლების ჯგუფის“ – „ბრიტანულ-ქართული აკადემიის“ ინვესტორისა და 70%-იანი წილის მფლობელის მიერ იყო დაკონტრაქტებული, ხოლო მისი მეუღლე მენეჯმენტში კამპუსის მშენებლობას კურირებდა. 30 პროცენტის წილის მქონე ნათია ჯანაშიამ და მისმა მეუღლემ ამ პერიოდში ჯამში ხელფასის სახით 5 მილიონი ლარი მიიღეს.
“არსებული მასალების შესწავლისა და ანალიზის შედეგად გამოიკვეთა, რომ ლისზე აგებული სკოლის ახალი სასწავლო კორპუსის მშენებლობა თავდაპირველ ბიუჯეტთან შედარებით 2–ჯერ ძვირი დაჯდა. იმ პერიოდში, ბაზარზე განხორციელებულ ანალოგიურ სამუშაოებთან შედარებით კი 3–ჯერ ძვირიც. ამას ემატება ისიც, რომ წლების განმავლობაში სკოლის კაფეტერიის პროდუქტებით მომმარაგებელი კომპანიის მიერ სკოლისთვის, საბაზროსთან შედარებით, საგრძნობლად გაზრდილი ფასებით შესყიდული პროდუქტის მიწოდება და სხვა“, – აღნიშნა კაპანაძემ.
აფბას ხელმძღვანელი ხაზს უსვამს იმ გარემოებას, რაც მონიტორინგისას გამოიკვეთა. კერძოდ, გაფლანგვა-მითვისება დოკუმენტირებულად არის დადასტურებული საერთაშორისო აუდიტორული კომპანიების დიდი ოთხეულიდან ერთ-ერთის მიერ წარმოდგენილ დასკვნაში.
“სწორედ ეს გარემოებები, რაც აისახა საერთაშორისო აღიარების მქონე აუდიტორული კომპანიის მიერ წარმოდგენილ დასკვნაში,“საქართველოს განათლების ჯგუფის“ მიერ სამართალდამცავებთან მიმართვის საფუძველი გახდა და ფინანსთა სამინისტროს საგამოძიებო სამსახურის მიერ საქმე აღიძრა და გამოძიება დაიწყო გაფლანგვა-დატაცების ფაქტზე. როგორც ჩანს, ნათია ჯანაშიას და მისი მეუღლის მენეჯმენტის პერიოდში გაფლანგული 4 მილიონი დოლარი, ამ გამოძიების საკვანძო მომენტი გახდება“, – დასძინა კაპანაძემ საუბრის დასასრულს.
კომენტარები