ჯუანშერ ბურჭულაძის დღევანდელ პროცესზე მოწმეები იკითხებიან

ჯარის ძარცვის საქმე – თბილისის საქალაქო სასამართლოში ჩვენებას ბრალდების მხარის მოწმეები აძლევენ. სხდომას ესწრება თავდაცვის ყოფილი მინისტრი, ჯუანშერ ბურჭულაძეც.

დღევანდელი პროცესი ცოტა ხნის წინ დაიწყო. 7 მოწმიდან სამი უკვე გამოიკითხა, რადგან დაცვის მხარეს სუს-ის ანტიკორუფციული საქმეთა დეპარტამენტის თანამშრომლებთან კითხვები არ ჰქონდა. კითხვები არ დაუსვამთ არც ბრალდებულებს, მათ შორის ჯუანშერ ბურჭულაძეს.

გამომძიებლებმა სასამართლოს უამბეს, როგორ მიმდინარეობდა საგამოძიებო მოქმედებები, რომ ჩხრეკა მოსამართლის განჩინების საფუძველზე ჩატარდა. ასევე, ისაუბრეს იმ გარემოებებზე, თუ რა გარემოში მოხდა ბრალდებულების დაკავება.

ამ დროისთვის, ჯუანშერ ბურჭულაძის დამკავებელი გამომძიებლები სასამართლოში არ მისულან. არ არის გამორიცხული, რომ რომელიმე მათგანი დღევანდელ პროცესზე გამოიკითხოს.

ამასთან, დღეს სხდომაზე გამოსაკითხ მოწმეებს შორის არის ადამიანი, რომელიც მინისტრობისას ჯუანშერ ბურჭულაძის მძღოლი იყო.

რაც შეეხება ბრალდებულების ოჯახის ახლობლებს, რომლებიც მძღოლები არიან, ვფიქრობთ, ისინი დაადასტურებენ გამოძიებაში მიცემულ ჩვენებას, სადაც საუბრობდნენ ჯუანშერ ბურჭულაძის და ვასილ მხეიძის მიერ განხორციელებულ გარკვეულ გადარიცხვებთან მიმართებით,” – ამბობს პროკურორი.

ცნობისთვის, სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციის ფაქტებზე ბრალდებულ თავდაცვის ყოფილ მინისტრს, ჯუანშერ ბურჭულაძეს საერთო ჯამში 1 593 212 ლარის უკანონო და დაუსაბუთებელი შემოსავლის ლეგალიზაციას ედავებიან.

შეგახსენებთ იმასაც, რომ დიდი ოდენობით თანხის გაფლანგვის ბრალდებით დაკავებული არიან თავდაცვის მინისტრის ყოფილი მოადგილე, გიორგი ხაინდრავა, ამავე სამინისტროს შესყიდვების დეპარტამენტის ყოფილი უფროსი, ვლადიმერ ღუდუშაური და ჯუანშერ ბურჭულაძის ცოლის ძმა, ვასილ მხეიძე.

ვლადიმერ ღუდუშაურსა და გიორგი ხაინდრავას გამოძიება დიდი ოდენობით თანხის გაფლანგვას ედავება, ვასილ მხეიძეს კი გაფლანგვაში დახმარებას. დაკავებულებს 7-დან 11 წლამდე პატიმრობა ემუქრებათ.
გამოძიების ინფორმაციით, ჯუანშერ ბურჭულაძის მოადგილემ, გიორგი ხაინდრავამ და თავდაცვის სამინისტროს შესყიდვების დეპარტამენტის იმდროინდელმა უფროსმა, ვლადიმერ ღუდუშაურმა ბურჭულაძის ცოლის ძმის, ვასილ მხეიძის დახმარებით, სამინისტროს მიერ სამხედრო ჰოსპიტლისთვის, მაგნიტურ-რეზონანსული ტომოგრაფის აპარატის შეძენის პროცესში მიზანმიმართული ქმედებებით არაკონკურენტული გარემო შექმნეს. უწყება ამბობს, რომ დაკავებულებმა საქართველოს თავდაცვის სამინისტროს კუთვნილი 1 333 728 ლარი გაფლანგეს.