საქართველოს ეროვნული ბოტანიკური ბაღი ვიზიტორებისთვის დროებით დაიკეტა. ადმინისტრაციის განმარტებით, გადაწყვეტილება უსაფრთხოების ზომებიდან გამომდინარე იქნა მიღებული.
როგორც ბაღის გავრცელებულ განცხადებაშია ნათქვამი, თოვლის სქელმა საფარმა ბაღის მრავალწლიან ისტორიაში ერთ-ერთი ყველაზე მასშტაბური ზიანი გამოიწვია. სტიქიამ დააზიანა როგორც უნიკალური ხე-მცენარეების კოლექციები, ისე მნიშვნელოვანი ექსპონატები.
ადმინისტრაციის ინფორმაციით, დაზიანებულია იშვიათი მერქნიანი მცენარეების გამორჩეული ეგზემპლარები, რაც ბაღის ეკოსისტემისთვის სერიოზულ გამოწვევას წარმოადგენს. სპეციალისტების შეფასებით, არსებული ვითარება განსაკუთრებულ ყურადღებასა და ხანგრძლივ აღდგენით პროცესს საჭიროებს.
„ზიანის მასშტაბიდან გამომდინარე, პროცესში ჩართულია ბაღის ყველა შესაბამისი სამსახური. სპეციალისტები ეტაპობრივად აფასებენ მიყენებულ ზარალს და ამუშავებენ აღდგენითი ღონისძიებების დეტალურ გეგმას“, – აცხადებენ ბოტანიკურ ბაღში.
მათივე ცნობით, ამ ეტაპზე ადმინისტრაცია და შესაბამისი სამსახურები საგანგებო რეჟიმში მუშაობენ. მიმდინარეობს ტერიტორიის გაწმენდა და რისკების შეფასება, რათა ვიზიტორთა უსაფრთხო გადაადგილება გარანტირებული იყოს.
ბაღის წარმომადგენლების თქმით, სტიქიის შედეგების სრულად აღმოსაფხვრელად მნიშვნელოვანი დრო და რესურსი იქნება საჭირო. ობიექტის დროებითი დახურვა სწორედ პრევენციულ ხასიათს ატარებს.
სამუშაოების დასრულებისთანავე, ის ლოკაციები, სადაც ამჟამად გადაადგილება შეზღუდულია, ეტაპობრივად დაუბრუნდება ჩვეულ სამუშაო რეჟიმს.
კომენტარები