საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
ახლა ისრაელმა იცის, რომ ეს არის ერთ-ერთი უნიკალური და, შესაძლოა, ბოლო შანსიც კი, რათა მთელ რეგიონში გაანადგუროს ტერორისტული ქსელი და მისი მთავარი დამფინანსებელი – ირანის ისლამური რეჟიმი. ამიტომ ისინი საკმაოდ მყარად, შეკავშირებულად დგანან და ბალისტიკური რაკეტების ჩამოვარდნა მათ ასე ადვილად ვერ გატეხს. თუ ახლა ირანული რეჟიმი საბოლოოდ არ გატეხეს ან იძულებით კოლაბორაციაში არ შემოიყვანეს, ეს საბოლოო საფრთხეს მაინც ვერ გააქრობს და მხოლოდ მომავლისათვის გადაავადებს პროცესს.
ახლა ირანის რადიკალური რეჟიმის ძველი ნარჩენები თუ დროებითი ლიდერები, შიდა და რეგიონული ლეგიტიმაციისათვის, სამეზობლოში შიიტური მოსახლეობის აჯანყებისათვის, აშშ-ზე ზეწოლისა და ძალის დემონსტრირების მიზნით, ყველას და ყველაფერს რომ ესვრიან, ამაზე უკვე ვისაუბრეთ და ამაში მოულოდნელი ან უცნაური არაფერია.
რაც შეეხება რაკეტებს: მსოფლიოში არ არსებობს ბალისტიკური რაკეტების საწინააღმდეგო სისტემა, რომელიც 100%-იან შედეგს დადებს. თვით უახლესი ამერიკული THAAD სისტემაც კი ვერ იძლევა აბსოლუტურ გარანტიას. ასეთი იარაღი არ გამოუგონიათ. ჩათვალეთ, რომ ბალისტიკური რაკეტა არის ატმოსფეროდან მოწყვეტით მომავალი მეტეორიტი, რომელიც სამიზნეს კოლოსალური სიჩქარით ეცემა. მისი მიწიდან განადგურება უდრის ტყვიის ტყვიით განადგურების მცდელობას. ამიტომ არის ის ასეთი საშიში და სწორედ ამით არის აუცილებელი მტრის სარაკეტო არსენალის საწყის პოზიციებზევე, მიწაზე განადგურება.
ამ ყველაფრის საპასუხოდ, მთელი ღამიდან მოყოლებული ირანის ისლამური რევოლუციის მცველთა კორპუსისა და სამხედრო ძალების ბაზები ძალიან მაღალი ინტენსივობით იბომბება. ირანის თავზე აბსოლუტური საჰაერო დომინაცია მიღწეულია.
პ.ს. აშშ-ის ნაციონალური უსაფრთხოების ყოფილმა მრჩეველმა და ამ სფეროში გამორჩეულად მძიმეწონიანმა ფიგურამ ჯონ ბოლტონმა და აშშ-ს ყოფილმა სახელმწიფო მდივანმა მაიკ პომპეომ, რომელთა განადგურებაც რეჟიმს ჯერ კიდევ 10 წლის წინ ჰქონდა დაანონსებული, განაცხადეს რომ ერთადერთი საფრთხე ამ მთელი ოპერაციის იქნება ის, რომ საქმე ბოლომდე არ იყოს მიყვანილი და რეჟიმი გადარჩეს ან და ჩვენს ნებას არ დაჰყვესო. სწორია. საბოლოო გადაწყვეტა საუკეთესო გამოსავალია.
კომენტარები