ქართული ოცნების პარლამენტმის სოფლის მეურნეობის კომიტეტმა „ვაზისა და ღვინის შესახებ“ კანონში ცვლილებები მეორე მოსმენით განიხილა და მხარი დაუჭირა.
ზურაბ ეზუგბაიას თქმით, ცვლილებებით ზუსტდება ეტიკეტისა და სამომხმარებლო ტარას ტერმინები. კანონს ემატება ახალი ტერმინი – თანხმობა ვენახის გაშენებაზე.
ცვლილებების თანახმად, ღვინის კომპანია ვალდებულია, აღრიცხოს ალკოჰოლიანი სასმელის, სპირტის, ვაზის სამყნობი და სარგავი მასალების წარმოებასა და შენახვასთან დაკავშირებული ტექნოლოგიური პროცესები და ღვინის ეროვნულ სააგენტოს წარუდგინოს სავალდებულო შეტყობინებები.
ტექნოლოგიური პროცესების აღრიცხვისა და შეტყობინების ვალდებულება გაუჩნდება ღვინის ყველა კომპანიას, მათ შორის, იმ ღვინის მწარმოებლებსაც, რომელთა მიერ წარმოებული ღვინის რეალიზაცია, ჯამურად, წელიწადში 1500 ლიტრს არ აღემატება.
ცვლილებების თანახმად, 2026 წლის 1 მაისამდე გამოიცემა ბრძანება ,,სამეწარმეო ვენახის გაშენების წესის განსაზღვრის შესახებ“.
ზურაბ ეზუგბაიას განცხადებით, კანონით გათვალისწინებული ცვლილებები მხოლოდ სამეწარმეო სეგმენტს შეეხება და ახალ გასაშენებელ ვენახებზე გავრცელდება.
ქართული ოცნების გუნდის მტკიცებით, ამ რეგულაციით თანამედროვე სტანდარტების შესაბამისად გაშენდება ვენახები, რაც თავის მხრივ მაღალი ხარისხის ყურძენს მოგვცემს და მაღალი ხარისხის ღვინის წარმოებას მოვახერხებთ. მათ არ უთქვამთ, დღეის მდგომარეობით, საქართველოში გაშენებული ვაზი, მოყვანილი ყურძენი და წარმოებული ღვინო რა მიზეზთა გამო გამოაცხადეს დაბალხარისხიანად.
უცნობია ჯერჯერობით, რა მოიაზრება თანამედროვე სტანდარტებით ვაზის გაშენებაში და რა ახალ ფინანსურ ხარჯებთან იქნება ეს დაკავშირებული. ან, თუ აქამდე დაბალი ხარისხის ყურძენი მოგვყავდა და დაბალი ხარისხის ღვინოს ვწურავდით, იმიტომ რომ ვაზი, თურმე, არათანამედრო სტანდარტებით იყო გაშენებული, და თუ უკვე გაშენებულ ვენახს არ შეეხება რეგულაცია, გამოდის, ვისაც უკვე გაშენებული აქვს – ის ისევ უხარისხო ყურძენს და ღვინოს გამოიტანს ბაზარზე?
კომენტარები