უნაკლო კანონი და “ნაკლიანი” კანონები – რა “რესურსს” ითხოვს, ხუთჯერ ერთ კომენტარში, კობახიძე გახარიასგან?

ქართული ოცნების გუნდის ლიდერი, ირაკლი კობახიძე გახარიაზე და მის პარტიაზე საუბრობს და კომენტარებისას 5 ჯერ ამბობს სიტყვას – რესურსი. მაინც რა რესურსს ითხოვს ის გახარიას გუნდისგან? – ამბობს, რომ “უნაკლო კანონპროექტებს” არ დაუჭირეს მხარი. რომელი კანონპროექტი იყო უნაკლო და რომლები ნაკლიანი – არ დაუკონკრეტებია.

“მე მგონია, რომ უფრო მეტად მათ არ ჰყოფნით გამოცდილება, ზოგადად რესურსი პარლამენტში სათანადოდ, ხარისხიანად მუშაობის და ალბათ ამის შედეგია ის ყველაფერი, რაც ვიხილეთ. იყო აბსოლუტურად უნაკლო, ძალიან მნიშვნელოვანი კანონპროექტი და როდესაც ასეთ კანონპროექტს მხარს არ უჭერ, ბუნებრივია, აქ აჩვენებ სისუსტეს რესურსების თვალსაზრისით.

აბსოლუტურად არასერიოზულია კონკრეტული ქმედებები, რასაც ვხედავთ მისი მხრიდან, მისი პარტიის მხრიდან. რესურსი – ნული. თქვენ ხედავთ, მათ შორის, პარლამენტში მათ საქმიანობას: ინტელექტუალური რესურსი – ნული, ყველანაირი რესურსი – ნული, ლიდერი არის გაქცეული გერმანიაში, თავს აფარებს გერმანიას იმისათვის, რომ თავიდან აირიდოს შესაძლო სამართლებრივი პასუხისმგებლობა. ეს არის ამ პარტიის დღევანდელი მდგომარეობა, აბსოლუტურად არასერიოზულია ის ვითარება, რომელიც ამ პარტიაში არის შექმნილი.”