“დებატები ღმერთმა გადმოგვიგდო მაშველ რგოლად ოპოზიციის გამოცოცხლებისთვის” – დავით ზურაბიშვილი

პოლიტოლოგი, დავით ზურაბიშვილი:

კიდევ ერთხელ პოლიტიკური დებატების შესახებ.

ცხადია, არსებობს დებატების სტრატეგია, ტაქტიკა და ტექნიკაც. მოგება-წაგებას დებატების დროს მნიშვნელოვნად განაპირობებს არა მარტო ნათქვამის შინაარსი და ფორმა, არამედ დებატებში მონაწილეთა ვიზუალური მხარე, მათი ჟესტიკულაცია, მეტყველება, ხმის ტემბრი და ა. შ. კიდევ ბევრი სხვა ფაქტორი კომპლექსურად.

ეს კი ყველაფერი ასეა, მაგრამ აქ არის ერთი დიდი “მაგრამ”: ყველაფერ ზემოთ ჩამოთვლილს მნიშვნელობა აქვს მხოლოდ იმ შემთხვევაში, თუ მოდებატე მხარეებიდან არცერთი არ არის ასპროცენტიანი მტყუანი ან მართალი.

თუ სიმართლე და სამართლიანობა არსებითად არის ერთ მხარეს, ხოლო მეორე მხარეს კი ძირითადად ტყუილი და დემაგოგიაა, იქ ტექნიკური უპირატესობა არაფრის მომცემია. რა ოსტატურადაც არ უნდა დემაგოგობდეს ერთი და რა უხეიროდაც არ უნდა ამბობდეს მეორე სიმართლეს, მაყურებელთა უმრავლესობა მაინც გაარჩევს შავსა და თეთრს და მაინც დაინახავს ვინაა მტყუანი და ვინ მართალი. შესაბამისად, ასეთ დებატებში ყოველთვის გამარჯვებულია ის, ვის მხარესაც სიმართლე და სამართლიანობაა.

ამიტომაცაა ოცნებასთან დებატები ოპოზიციური ფლანგისთვის პირწმინდად მომგებიანი, რადგან ხელისუფლების მხარეს არანაირი სიმართლე არაა. საერთოდ არანაირი. მთელი სახელისუფლო პროპაგანდა არის ტყუილი, ცილისწამება და მდარე ხარისხის კონსპირაციები. ამ ბაგაჟის პატრონ ხელისუფლებასთან დებატების წაგება პრინციპულად შეუძლებელია.

მე არ ვიცი რატომ მოუნდა ბიძინა ივანიშვილს თავისი გუნდისთვის მოულოდნელადაც კი დებატების დაშვება საკუთარ პროპაგანდისტულ არხებზე. თეორიები ნორმალიზაციასა და ლეგიტიმაციაზე დებატების მეშვეობით, ჩემი აზრით სერიოზულ განხილვას არ უნდა იმსახურებდეს მისი შეუძლებლობის გამო, თუმცა, ხელისუფლების ზოგიერთი ქმედება იმდენად არაადეკვატურია, რომ არც ისაა გამორიცხული მართლა ამ დებატების დაშვებით აპირებდეს ხელისუფლება რაღაც ლეგიტიმაციის მოპოვების მაგვარს. საცა ციხით გვემუქრებოდა არაღიარების გამო, ყველანაირი სიგიჟე დასაშვებია თეორიულად.

თუმცა, რა მოტივაციაც არ უნდა ჰქონდეს ბიძინას, ხელისუფლებისთვის ნებისმიერი ფორმატის დებატები რეალურ ოპონენტთან შეუძლებელია იყოს წარმატებული და კობახიძე რაც უფრო ხშირად გამოჩნდება ამ დებატებში, მით უფრო მეტად მოუშლის ყველას ნერვებს და იმ ხალხსაც გამოიყვანს ქუჩაში, ვინც მანამდე არ გამოდიოდა.

მოკლედ, ჩათვალეთ, რომ ეს დებატები ღმერთმა გადმოგვიგდო მაშველ რგოლად ოპოზიციის გამოცოცხლებისთვის და თუ რამე მაკვირვებს ამ ვითარებაში ვარსკვლავებით მოჭედილი ცის გარდა, ეს არის წინასწარ მოგებული თამაშის ბოიკოტირების მცდელობები. რა რა და მსგავსი აბსურდი ქართულ პოლიტიკაშიც კი არ მინახავს აქამდე.