“ირანის საელჩომ ივანიშვილის სასტუმროც სწორედ ამიტომ შეარჩია” – ირანელი აქტივისტი, რომელიც “პარაგრაფის” თანამშრომლებს ძალადობაში ადანაშაულებს

ირანელი ქალი აქტივისტი, ტვ პირველთან ჰყვება, რომ სასტუმრო “პარაგრაფის” დაცვის თანამშრომლებმა ძალა გამოიყენეს და თავისუფლება აღკვეთეს, მხოლოდ იმიტომ, რომ ირანის სისხლიანი რეჟიმის მხარდაჭერას აპროტესტებდა.

ქართველმა მეგობრებმა შემატყობინეს, რომ ირანის საელჩო აპირებდა ისლამური რევოლუციის წლისთავი სასტუმრო “პარაგრაფში” აღენიშნათ და მეც მაშინვე გადავწყვიტე სამარცხვინო ღონისძიება გამეპროტესტებინა.  როცა სასტუმროში მივედი ჩემს სახელს სტუმრების სიაში ეძებდნენ, სწორედ ამ დროს მოვასწარი საკონფერენციო ოთახში შესვლა და იმის თქმა, რომ რეჟიმის მხარდაჭერა სირცხვილია. მაშინ როცა თავისუფლებისთვის მებრძოლ თინეიჯერებს, ქალებს და კაცებს ქუჩაში კლავენ,  მიუღებელია აღნიშნო ისლამური რევოლუციის წლისთავი.

შეკრებაზე 500 სტუმარი იყო მიწვეული ქართველი სასულიერო პირები და ქართულ ტრადიციულ ტანსაცმელში ჩაცმული ხალხიც ვნახე. რამდენიმე წამში მოვარდა დაცვის სამსახურის 3 თანამშრომელი, შემიპყრეს და სხვა ოთახში შემიყვანეს. 2  საათზე მეტი, სანამ ღონისძიება არ დასრულდა, გადაადგილება აკრძალული მქონდა.

ჩემთან ერთად მყოფ “პუბლიკას” ჟურნალისტს კი ტელეფონი წაართვეს და ჩემი ღონისძიებაზე შესვლის ამსახველი კადრები წაუშალეს. რამდენიმე ნაცნობმა გამაფრთხილა, რომ სასტუმრო “პარაგრაფში” მისვლით თავს საფრთხეში ვიგდებდი, რადგან მისი მფლობელი ბიძინა ივანიშვილი, სახიფათო კაცია და ირანის საელჩომ მისი სასტუმროც სწორედ იმიტომ შეარჩია, რომ თანამოაზრეები არიან.  აქვთ კავშირებიც და თუ ისინი მოინდომებენ შეუძლიათ პრობლემები შემიქმნან. როცა ვიკითხე რა ტიპის პრობლემებზეა საუბარი, შეიძლება სახლში ნარკოტიკიც კი ჩაგიდონო, მაგრამ მე ამის არ მეშინია. დიქტატორული რეჟიმის მოქმედების სტილს ვიცნობ. ჩემს თანამოქალაქეებს კლავენ და მე რეპრესიებით ვერ შემაშინებენ”- აცხადებს აქტივისტი.