დაუზიანა პასპორტი, უზღუდავდა განათლების მიღებას, სახლში ფარულად დაუყენა კამერები – გარდაბანში მომხდარი მკვლელობის ახალი დეტალები

გარდაბანში მომხდარი მკვლელობის ახალი დეტალები – ცნობილი ხდება, რომ ქმარი ცოლს, რომელთანაც არარეგისტრირებულ ქორწინებაში იმყოფებოდა, განათლების მიღებას უზღუდავდა, ასევე უკრძალავდა სხვა ადამიანებთან კონტაქტს და მუშაობას. ასევე აკონტროლებდა რომ არ დაეტოვებია ქვეყანა, რის გამოც  დაუზიანა პასპორტი.

პროკურატურის მიერ ცოტა ხნის წინ გავრცელებული ინფორმაციის თანახმად, კაცმა ცოლის სახლში ფარულად დააყენა სათვალთავლო კამერები.

დაკავებულს ბრალი დღეს წარედგინა. კაცს 20 წლამდე ან უვადო პატიმრობა ემუქრება.

საქართველოს პროკურატურამ გარდაბანში  დამამძიმებელ გარემოებებში  ჩადენილი განზრახ მკვლელობის, პირადი ცხოვრების საიდუმლოს ხელყოფის, დოკუმენტის დაზიანების და შემაკავებელი ორდერის დარღვევის ფაქტებზე,  ერთ პირს ბრალდება წარუდგინა.

შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებული 2018 წლიდან 2026 წლის 5 თებერვლის ჩათვლით არარეგისტრირებულ ქორწინებაში იმყოფებოდა დაზარალებულთან, რომელსაც თანაცხოვრების პერიოდში, ქალისა და მამაკაცის თანასწორობის შეუწყნარებლობის მოტივით, უზღუდავდა განათლების მიღების, სხვა ადამიანებთან კონტაქტის, მუშაობისა და პირად საკითხებთან დაკავშირებული გადაწყვეტილებების დამოუკიდებლად მიღების უფლებას.
ასევე ბრალდებული მუდმივად აკონტროლებდა დაზარალებულის გადაადგილებას, დაუზიანა პასპორტი, ხოლო 2026 წლის  დასაწყისში მეუღლის სრულად გაკონტროლების მიზნით, მის საცხოვრებელ ბინაში, ფარულად, დააყენა სამეთვალყურეო კამერები.
5 თებერვალს ბრალდებულმა განზრახ მოკვლის მიზნით,  მეუღლეს გულ-მკერდისა და ზურგის არეში დანით მიაყენა ჭრილობები.
მიღებული დაზიანებების შედეგად , დაზარალებული სამედიცინო დახმარების აღმოჩენამდე გარდაიცვალა.

ბრალდებული სამართალდამცველებმა 2026 წლის 6 თებერვალს დააკავეს. მას ბრალდება საქართველოს სისხლის სამართლის კოდექსის, 11 პრიმა 381 პირმა მუხლის პირველი ნაწილით (ოჯახის ერთი წევრის მიერ ოჯახის სხვა წევრის მიმართ  გამოცემული შემაკავებელი ორდერით  გათვალისწინებული მოთხოვნებისა და ვალდებულებების შეუსრულებლობა),  157 პრიმა მუხლის პირველი ნაწილით პირადი ცხოვრების საიდუმლოს უკანონოდ მოპოვება და შენახვა), 363-ე მუხლის პირველი ნაწილით (დოკუმენტის დაზიანება, ჩადენილი პირადი მოტივით), 11 პრიმა 109-ე მუხლის „თ“ და „კ“ ქვეპუნქტებით (განზრახ მკვლელობა ქალისა და მამაკაცის თანასწორობის შეუწყნარებლობის გამო; ოჯახის წევრის მიმართ) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით, სასამართლოს კანონით დადგენილ ვადაში მიმართავს.