,,უმაღლესი განათლების შესახებ” კანონში ცვლილებები პარლამენტმა მესამე მოსმენით მიიღო

პარლამენტმა „უმაღლესი განათლების შესახებ“ კანონში ცვლილებათა პაკეტი დაჩქარებული წესით 2 დღეში განიხილა და დაამტკიცა. 86 – მომხრე, 10 – წინააღმდეგი. ასეთია კანონპროექტის მესამე მოსმენის კენჭისყრის შედეგები.

საკანონმდებლო ორგანოში მთავრობის ინიციირებული კანონპროექტი განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ წარადგინა და აღნიშნა, რომ ახალი საკანონმდებლო პაკეტი გარკვეული ტიპის ცვლილებებს და დაზუსტებებს მოიცავს.

კანონში შეტანილი ცვლილებების მიხედვით, უმაღლესი საგანმანათლებლო დაწესებულებების რეორგანიზაციის ჩარჩო ზუსტდება, აკადემიური პერსონალის ჩამონათვალს წამყვანი პროფესორის თანამდებობა ემატება, ასევე რეგულირდება ამ თანამდებობის მქონე პირის აკადემიურ საბჭოში წევრობისა და დეკანის არჩევის პროცესში მონაწილეობის უფლებები.

ამავე კანონპროექტით, უმაღლეს საგანმანათლებლო დაწესებულებებს განსაზღვრული ვადით იმ პროგრამების მილევად რეჟიმში განხორციელების შესაძლებლობა მიეცემათ, რომლებიც მთავრობის დადგენილებით არ იქნება გათვალისწინებული. შესაბამისად, აღნიშნულ პროგრამებზე უკვე ჩარიცხულ სტუდენტებს იმავე უმაღლეს სასწავლებელში, შესაბამისი ვადით სწავლის გაგრძელების შესაძლებლობა ექნებათ.

კანონპროექტის ავტორები დასაბუთებით, ცვლილებათა პაკეტის დაჩქარებული წესით განხილვა მიზანშეწონილია იმისათვის, რომ კანონპროექტით შემოთავაზებული, უმაღლესი განათლების რეფორმით გათვალისწინებული საკადრო პოლიტიკის დახვეწა და შესაბამისი ღონისძიებების განხორციელება უმაღლესი განათლების სისტემაში დროულად მოხდეს.

ამასთან, კანონპროექტის განმარტებით ბარათში აღნიშნულია, რომ უმაღლესი განათლების რეფორმის მრავალკომპონენტიანობიდან გამომდინარე შესაძლოა სახელმწიფო ბიუჯეტიდან დამატებითი ასიგნებების გამოყოფის აუცილებლობა დადგეს.

„საქართველოს 2026 წლის სახელმწიფო ბიუჯეტის შესახებ“ საქართველოს კანონში უმაღლესი განათლების მიმართულებით გათვალისწინებულია – 153.3 მილიონი ლარი. გამომდინარე იქიდან, რომ უმაღლესი განათლების რეფორმა მრავალკომპონენტიანია, რომელიც მოიცავს მათ შორის საკადრო პოლიტიკის დახვეწას, ამ და სხვა მიმართულებით შესაძლოა რეფორმის ფარგლებში საჭირო გახდეს დამატებითი ასიგნებების გამოყოფის აუცილებლობა. 2026 წლიდან დაიწყება კონცეფციის განხორციელების პირველი ეტაპი, რომლის ძირითადი დაფინანსებაც გათვალისწინებულია ზემოაღნიშნული წლიური ბიუჯეტის შესახებ კანონში, ხოლო რაც შეეხება მომავალი 3-4 წლის კონცეფციას, მის განსახორციელებლად საჭირო დაფინანსების მოცულობა გათვალისწინებული იქნება შემდგომი/შესაბამისი წლების საბიუჯეტო ასიგნების ფარგლებში”, – აღნიშნულია განმარტებით ბარათში.