ყოფილი პარლამენტარი, ეკონომისტი რომან გოცირიძე:
,,იანვარში, რაც ანტისაფასო პროპაგანდისტული სპეცოპერაცია დაიწყო, ფასებმა 1,2 პროცენტით მოიმატა დეკემბრის თვესთან შედარებით. სურსათზე ფასები წლიურად 10 პროცენტით გაიზარდა. სინამდვილეში ინფლაცია იმაზე მეტია, ვიდრე საქსტატი აჩვენებს. ეს დაწესებულება “ოცნების” მთავრობის მომსახურედ გადაიქცა. სწორედ ამიტომ, ამოეწურა რა თანამდებობაზე ყოფნის ორი ვადა, ანუ 8 წელიწადი, სპეციალურად ცვლიან კანონს და მისი დირექტორის უვადოდ დანიშვნის წესი შემოაქვთ.
ინფლაციის ( ისევე როგორც მშპ-ს) მაჩვენებელი მრავალი გზით ყალბდება. საქსტატის მიერ გამოცხადებული ფასების გადამოწმება ფაქტობრივად შეუძლებელია, ვინაიდან ჩვენთან მისი აღრიცხვა ხდება ძველი, მამაპაპური მეთოდით. დადიან რვეულითა და ფანქრით სავაჭრო ობიექტებში და იწერენ ფასებს. ევროპის ქვეყნებში ფასების აღრიცხვა ძირითადად ელექტრონულად ხდება.
ინფლაცია ელექტრონულად გაიანგარიშება ონლაინ ფასების გამოყენებით: საცალო ქსელები სტატისტიკურ უწყებებს გადასცემენ სალაროს სისტემებიდან ამოღებულ ტრანსაქციებს, სადაც ჩანს რეალური ფასი და გაყიდული საქონლის რაოდენობა. ეს მონაცემები იწმინდება და “იწონება” სამომხმარებლო კალათის მიხედვით, რის შედეგადაც მიიღება ფასების რეალური დინამიკა.
დავაკვირდეთ დღეს გამოქვეყნებულ ინფორმაციას. დავუშვათ, საქსტატს არ უნდა, რომ ინლაციის წლიური მაჩვენებელი იყოს მაღალი. ვთქვათ, ფასების ზრდის რეალური სიდიდე არის 5 პროცენტი, საქსტატს კი უნდა აჩვენოს 4,8 პროცენტი( რა რიცხვიც დღეს დასვეს). ჩამოთვლილია საქონელი, რომელზეც ფასებმა მოიმატა. აქვეა ნაჩვენები, რომ თურმე რომელიღაც საქონელზე იანვარში წინა თვესთან შედარებით ფასები შემცირებულა. კერძოდ: მინერალურ და წყაროს წყალზე, უალკოჰოლო სასმელებსა და ნატურალურ წვენებზე (-0.5 პროცენტით), ტანსაცმლზე (-4.8 პროცენტით), ფეხსაცმლზე (-3.4 პროცენტით). დავუშვათ მართლა შემცირდა ფასები საქონლის ამ ჯგუფზე ერთი-ორი პროცენტით, მაგრამ გინდა მთლიანი ინფლაციის ლამაზი მაჩვენებლის გამოყვანა. რა შეიძლება მოიმოქმედო? აიღებ და დაწერ, რომ ამ საქონელზე ფასები შემცირდა არა 1-2, არამედ ხუთი პროცენტით. ვინ გადაამოწმებს ამას, ათასობით მაღაზიაში იყიდება ფეხსაცმელი და ტანსაცმელი. იმასაც არ გეტყვიან, რომელ სავაჭრო ობიექტებზე აწარმოებენ დაკვირვებას.
მთავრობის ანტიინფლაციური კამპანია წარუმატებელი რომ არ აღმოჩნდეს, მომავალში, შეშინებული საქსტატი უფრო ფრთხილად მოეკიდება ყოველ გამოსაქვეყნებელ რიცხვს და პოლიტუკური ცენზურის ქვეშ გაატარებს.
სტატისტიკის გაყალბება სერიოზული დანაშაულია. დამახინჯებული ინფორმაცია ვნებს ბიზნეს, თითოეულ მოქალაქეს და ხელს უშლის სახელმწიფო ორგანოების( მაგალითად, ეროვნული ბანკი) გამართულ მუშაობას.
ყველა, ვინც აყალბებს მონაცემებს, აღმოჩნდება განსასჯელის სკამზე. თუ ვინმეს ჰგონია, რომ საქსტატიდან ამას არ დაადასტურებენ, ძალიან სცდებიან. საპროცესო გარიგების სანაცვლოდ სიამოვნებით დაადებენ ხელს, ვისაც საჭიროა.“
კომენტარები