ინფექციონისტი, მაია ბუწაშვილი:
ამ ყინვაში ქუჩაში მობუზულ ძაღლებს და კატებს რომ ვუყურებ, ისევ მიჩნდება კითხვა, რატომ ვართ ასეთი ბრენდომანები. თან ეს მარტო ჩანთაზე, ჩექმაზე და ტანსაცმელზე კი არ ვრცელდება, ცხოველებსაც ბრენდის მიხედვით ვარჩევთ.
წარმოიდგინეთ, ერთ დღეს რომ ყველამ, ვისაც შინაური ცხოველის ყოლა უნდა, გადაწყვიტოს და ლეკვი ან კნუტი კი არ იყიდოს, უამრავი მიტოვებული ცხოველიდან ერთ-ერთი აიყვანოს. მე რამდენიმე ეგეთი მყავს (ერთის ფოტო აქ არის) და დამიჯერეთ, ძალიან საყვარლები, ერთგულები და მადლიერები არიან. ასევე, უფრო გამძლეებიც და წამდაუწუმ ვეტრინართან სარბენები არ იქნებით. ყიდვის ფულიც დაგეზოგებათ:) თან ზოგიერთი “ბრენდი” რა ძვირია, მოგეხსენებათ. ჰოდა თანდათან იქნებ აღარ იყოს ამდენი უმწეო, გასაცოდავებული ცუგა და ფისო ქუჩაში (იმის იმედი აღარ მაქვს, რომ სახელწიფოებრივ დონეზე მოგვარდება ეს საკითხი).ისიც წარმოიდგინეთ, თუ ოჯახში ბავშვია, მშობელი როგორი ადამიანურობის მაგალითს აძლევს, როცა მიტოვებულ არსებას შეიფარებს და სიცოცხლეს აჩუქებს. ბავშვისთვის ეს შეიძლება მთელი ცხოვრების მანძილზე მისაბაძი, სხვის სიცოცხლეზე ზრუნვის სტიმული გახდეს.
არ მივიღებ კომენტარებს იმის შესახებ, რომ ქუჩის ცხოველიდან “ათასი რამე გადაგედება”. პარაზიტებზე დამუშავება და ვაქცინაცია როგორც “ბრენდულ”, ისე ქუჩიდან აყვანილ ცხოველს ჭირდება. ისე კი, ზოგადად, შეგახსენებთ, ადამიანისგან მეტი ინფექცია შეიძლება გადაგედოთ, ვიდრე ძაღლის და კატისგან.
კომენტარები