დღეს, ქართული ოცნების პრემიერმა, ირაკლი კობახიძემ, ციხეში მყოფი ნიკა გვარამია დაადანაშაულა იმაში, რომ დებატები აღარ არსებობს პრაქტიკულად.
ცნობისთვის, კობახიძის ერთ–ერთი ბოლო ინტერვიუ კრიტიკულად განწყობილ მედიაში, სწორედ, ნიკა გვარამიას ტელევიზიაში, გიორგი გაბუნიასთან იყო, 2021 წელს. ქართული ოცნება მაშინაც აანონსებდა დებატებისთვის მზაობას, თუმცა, 2021 წლის 5 ივლისის მასშტაბური დარბევის, ადამიანების ქუჩებში ცემის და დევნის, ლექსო ლაშქარავას ცემის და სიკვდილის შემდეგ, ქართულ ოცნებას კრიტიკული მედიისთვის კითხვებზე პასუხის გაცემა აღარ სურდა.
გვარამიამ დავალება წარმატებით შეასრულა – მან მედიასტანდარტად დაამკვიდრა ტყუილი, ლანძღვა, გინება, ცილისწამება და ისტერია, საბოლოოდ კი ისეთი ტოქსიკური მედიაგარემო შექმნა, რომ ნორმალურ, ჯანსაღ ადამიანს აღარ სურს მონაწილეობა მიიღოს კამათში, რომელიც, საბოლოოდ, შეურაცხყოფით სრულდება. თავის მხრივ, ამ მოცემულობამ საზოგადოება გახლიჩა და წაართვა მას დემოკრატიის მთავარი პრინციპით სარგებლობის უფლება – მოისმინოს განსხვავებული პოზიციები და არჩევანი საკუთარი შეხედულების შესაბამისად გააკეთოს. დღეს ჩვენ ვხედავთ, ერთი მხრივ, სრულად მარგინალიზებულ, პარტიულ დანაყოფს, რომელსაც არაფერი აქვს საერთო ჟურნალისტიკასთან, ხოლო, მეორე მხრივ, მედიას, რომელიც შექმნილი ვითარებიდან გამომდინარე იძულებულია, საკუთარი ფუნქციის შესრულების პარალელურად, მუდმივ რეჟიმში პასუხი გასცეს მეორე მხრიდან წამოსულ დეზინფორმაციის ნიაღვარს, – წერს კობახიძე
სად, როდის, რა გზით მოძებნის კობახიძე “დემოკრატიის საყრდენს” და ვინ დაუმალა ის ქართველ ხალხს?
კომენტარები