შემოსავლების სამსახურის უფროსის ყოფილი მოადგილე ვლადიმერ ხუნდაძე საგამოძიებო ორგანოებს ჩაბარდა. აღნიშნული ინფორმაცია “ტვ პირველს” ვლადიმერ და კობა ხუნდაძეების ადვოკატმა დაუდასტურა და აღნიშნა, რომ ვლადიმერ ხუნდაძის ჩაბარების შემდეგ მისი დაცვის ქვეშ მყოფი გათავისუფლებულია.
აღსანიშნია, რომ კობა ხუნდაძე საქართველოს რკინიგზის მაღალჩინოსანი იყო. კობა ხუნდაძეს გამოძიება უკანონო შემოსავლების ლეგალიზებას, ფულის გათეთრებას ედავებოდა. მას 9-დან 12 წლამდე პატიმრობა ემუქრებოდა, თუმცა ირკვევა, რომ დაახლოებით თვე-ნახევრის წინ საპატიმრო გირაოს სანაცვლოდ დატოვა.
„როგორც გავიგე, ასე( თვითონ ჩაბარდა) და მისი ძმა გამოუშვეს და ეგ ჩაბარდა. მისი ძმა არ ვიცი რატომ გამოუშვეს. მისი ძმა გირაოთი გამოუშვეს, ეს კი ჩაბარდა. ყველა ადვოკატი ჩამოაშორეს, მათ შორის, მეც მითხრეს, თავი შეიკავეო. ეს მოხდა ერთი თვის, თვე-ნახევრის წინ. მისი ძმა ხომ არის კობა, ის გაუშვესო გირაოთიო და ესო, ვლადიმერი კი ჩაბარდაო. ეტყობა, თავის თავზე აიღო. მკურნალობა ჩაიტარა, ოპერაცია ჩაიტარა და მერე ალბათ, რომ გაიგო ძმის დაპატიმრების ამბავი, რაღაცაში იყო საქმე და ჩამოვიდა და ჩაბარებულა. მე კი არ მომეწონა რომ ჩაბარდა, მაგრამ რა ვიცი, – ამბობს ზურაბ ტაბიძე “პირველებთან” სატელეფონო საუბარში.
“პირველები” ასევე გრიგოლ ლილუაშვილის ადვოკატსაც დაუკავშირდა და ჰკითხა, დევს თუ არა საქმეში კობა ხუნდაძის ჩვენება.
„ზოგადად, მე ვიცი ეს ხალხი. ხო, ეგ საინტერესოა. ეგ ჩვენთან ხომ არაფერ შუაშია და მე რატომ უნდა ვიცოდე. არ მაქვს უფლება, გესაუბროთ საქმის მასალებთან დაკავშირებით, მაგრამ ზოგადად, თქვენ რასაც ბრძანებთ, კობას ვიცნობ, ვიცი ვინც არის, მისი ძმაც ვიცი ვინც არის. მეტი არაფერი შემიძლია, დაგიდასტუროთ. და ეს ინფორმაცია თქვენგან გავიგე. ე.ი. აღკვეთი შეუცვალეს კობას, ხომ? ვლადიმერ ხუდნაძეზე, როგორც ვიცი, ანალოგიურად იყო ბრალდება წაყენებული, თუ არ ვცდები, საერთოდ სხვა ეპიზოდზე, ფალსიფიკაციის თემაზე. ნამდვილად არ მსმენია“, – ამბობს რობერ გრიგალაშვილი.
შემოსავლების სამსახურის უფროსის ყოფილ მოადგილეს, ვლადიმერ ხუნდაძეს სასამართლომ აღკვეთის ღონისძიების სახით პატიმრობა დაუსწრებლად შეუფარდა.
მას ბრალი სამსახურებრივი უფლებამოსილების ბოროტად გამოყენების ფაქტზე, უაქციზო ალკოჰოლის საწარმოს მფარველობისთვის წარედგინა. ადვოკატის ინფორმაციით, ვლადიმერ ხუნდაძე თურქეთში, სამკურნალოდ იმყოფებოდა.
ამასთან, 22 ოქტომბერს პროკურატურის მიერ ჩატარებული ბრიფინგიდან გახდა ცნობილი, რომ დააკავეს კობა ხუნდაძე, რომელიც ვლადიმერ ხუნდაძის ძმაა. ის პროკურატურამ გრიგოლ ლილუაშვილთან დაახლოებულ პირად წარადგინა. 22 ოქტომბერს სწორედ მისი სახლიდან ამოიღეს 94 კონვერტად დახარისხებული 1 319 300 აშშ დოლარი კორუფციის საქმეზე მიმდინარე გამოძიების ფარგლებში ჩატარებული ჩხრეკისას.
კომენტარები