რუსთაველზე უწყვეტი პროტესტი გრძელდება. საახალწლო აქცია-კონცერტი დაიგეგმა 31 დეკემბერს 23:00 საათზეც.
ღონისძიების ორგანიზატორები „კულტურა დემოკრატიისთვის“, საჯარო მოსამსახურეთა დამოუკიდებელი პროფესიული კავშირი „კონსტიტუციის 78 მუხლი“, „საფიხვნო“, საქართველოს მუსიკოსთა პროფესიული კავშირი, Observers/დამკვირვებლები, „წინაპრები“, „მხოლოდ თავისუფალი არჩევნები“, „მთა თავისუფლებისთვის“ არიან.
“ერთი წელია, რაც რუსთაველის გამზირი იქცა უწყვეტი პროტესტის კერად. ჩვენი ქვეყნის უახლესი ისტორიის გამარჯვებები და ტკივილები აქ არის აღბეჭდილი და კვლავ აქ იწერება მისი ისტორია. აქ ვზეიმობთ და აქ ვგლოვობთ, აქ ვხვდებით კვლავ ახალ წელს ერთად, რადგან აქ ვართ უწყვეტად 400 დღე და აქ ვიქნებით, სანამ ამის საჭიროება იქნება. იმიტომ, რომ სხვანაირად არ შეგვიძლია და იმიტომ, რომ შვილები არ გვაპატიებენ დანებებას. აქ ვხვდებით ყველა, განუსაზღვრელად მრწამსისა თუ შეხედულებების, პროფესიისა თუ ასაკის, იმიტომ, რომ ეს ქვეყანა არის ყველასი და იმიტომ, რომ მხოლოდ ერთად შეგვიძლია მისი უკეთესი მომავლის შენება.
საახალწლო პროგრამა დაიწყება 23:00 საათიდან პირველ სკოლასთან, სადაც მოვისმენთ სინდისის პატიმრების გზავნილებს, წინააღმდეგობაში მყოფი ხელოვანების კონცერტს და პროექტებს. ახალი წელი ყველასია, ამიტომ ვისაც მოესურვება, შეუძლია მოიტანოს ტკბილი თუ ცხელი, ამბავი თუ პროექტი რუსთაველზე”, – ნათქვამია აქციის ორგანიზატორების განცხადებაში.
კომენტარები