,, ილიას დაბადების დღე არ ახსოვთ, არც მისი გახვრეტილი შუბლი, არც იაკობ გოგებაშვილს ცხოვრება რომ გაუმწარეს და აი იოსების დაბადების დღე ახსოვთ“ – ბიძინა გიორგობიანი

ყოფილი პოლიტპატიმარი, ბიძინა გიორგობიანი სოციალურ ქსელში წერს:

,,რამოდენიმემ პირად მიმოწერაში მკითხა და უფრო მეტმა მომილოცა იოსებ სტალინის დაბადების დღე. ეტყობა ისევ ცოცხალია ეს ფენომენი, რომელიც ქართული კულტურისათვის სავსებით უცხოა. ძლევამოსილი მბრძანებელი და თან ქართული წამოშობის, ასე ადვილად არ ტოვებს ადამიანთა გონებას. ილიას დაბადების დღე არ ახსოვთ, არც მისი გახვრეტილი შუბლი, არც იაკობ გოგებაშვილს ცხოვრება რომ გაუმწარეს და „მოგებაშვილს“ ეძახდნენ, აი იოსების დაბადების დღე ახსოვთ და ვინმეს მენტალობის გამოცდა თუ უნდათ (ამ შემთხვევაში რატომ გავხდი ობიექტი ვერ ვხვდები ), ულოცავენ და ეკითხებიან „რას ფიქრობ სტალინზე?“ რას ვფიქრობ და სტალინი ერთდროულად ისეთივე ქართველი იყო, როგორიც რუსი, ან სხვა ეროვნება. სტალინი იყო 19-20 საუკუნის სწავლებების ტიპიური პროდუქტი, დამახინჯებული მარქსიზმის ე.წ.სოც- ინტერნაციონალის იდეალების ერთგული ფუნქციონერი. მეტი სიღრმე მის საქმიანობაში არ ჩანს. მას ბევრ ტყუილ-მართალს მიაწერენ. სტალინს არ უარყვია ქართველობა, ეს 50-იანებში მოგონილი ისტორიაა, მაგრამ მისი პატრიოტიზმი აშკარად გადაჭარბებულია და საქართველოში, პატრიოტიზმის კრიტერიუმების სიდუხჭირეს მოწმობს.
ჩვენს ეპოქაში შესაძლოა ყოფილიყო ლიბერალური ინტერნაციონალის ავანგარდში, რუსეთში ან სხვაგან. მგონია, რომ ახალი დროის სტალინისტები ძალიან სხვა სამყაროში ცხოვრობენ და მე მათ რიცხვში არა ვარ. სხვა რამეები მომილოცეთ ჯობს, ხვალიდან დღე იზრდება და ღამე პატარავდება. ღმერთმა ქნას ომი მალე დასრულდეს ჩვენს გარშემო.“