მსოფლიოს ათობით ქვეყანაში გრიპის ახალი ტალღა გავრცელდა და ამ სეზონზე შემთხვევათა დიდი ნაწილის მიზეზი ვირუსის ახალი, განსაკუთრებით საშიში შტამი გახდა.
თავდაპირველად, H3N2 შტამის K სუბკლადი ავსტრალიასა და ახალ ზელანდიაში აღმოაჩინეს, რასაც მოჰყვა აფეთქებები იაპონიასა და დიდ ბრიტანეთში. ამ დროისთვის, ვირუსის ეს ვარიანტი უკვე დაფიქსირებულია 30-ზე მეტ ქვეყანაში, მთელ მსოფლიოში.
ეს ვარიანტი ადრე იშვიათად გვხვდებოდა, რის გამოც ადამიანებს მის მიმართ არასაკმარისი იმუნიტეტი აქვთ. დიდ ბრიტანეთში ყოველკვირეულად ათასობით დაავადებული ხვდება საავადმყოფოში.
რა არის გრიპის ვირუსის H3N2-ის მუტაცია?
გრიპის ვირუსები მუდმივად მუტაციას განიცდიან და ექიმები ცვლილებებს აკვირდებიან, რათა მათ საწინააღმდეგოდ ახალი, ეფექტიანი ვაქცინები შექმნან.
უმეტეს შემთხვევაში, მუტაციები მცირეა, მაგრამ ზოგჯერ ვირუსი მკვეთრად და არსებითად იცვლება. როგორც კემბრიჯის უნივერსიტეტის პათოგენების ევოლუციის ცენტრის დირექტორი, დერეკ სმიტი განმარტავს, H3N2-მა შვიდი მუტაცია განიცადა.
“ის თითქმის აუცილებლად მოედება მთელ მსოფლიოს“, – წინასწარმეტყველებს პროფესორი სმიტი.
უფრო საშიშია თუ არა ეს შტამი?
ადამიანები H3N2-ის K სუბკლადს ბოლო წლებში იშვიათად შეხვედრიან. შესაბამისად, მათ მის მიმართ მდგრადი იმუნიტეტი არ გამოუმუშავებიათ.
ამიტომ, მიუხედავად იმისა, რომ ახალი გრიპის სიმპტომები შესაძლოა ჩვეულებრივზე მძიმე არ იყოს, მეტი ადამიანის დაინფიცირებაა მოსალოდნელი.
უნდა გვახსოვდეს, რომ ზოგიერთი ვირუსს სიმპტომების გარეშეც გადაიტანს, მაგრამ მთავარი სიმპტომებია სიცხე, სხეულის სხვადასხვა ნაწილის ტკივილი და სწრაფი დაღლილობა, ხოლო ხანდაზმულებისა და სხვა დაავადებებით დასუსტებული ადამიანებისთვის, ეს ვირუსი, შესაძლოა, სასიკვდილოც კი აღმოჩნდეს.
“ასეთი ვირუსი დიდი ხანია არ გვინახავს. დინამიკა უჩვეულოა”, – ამბობს ნიკოლა ლუისი, ფრენსის კრიკის ბრიტანული ინსტიტუტის გრიპის მსოფლიო ცენტრის დირექტორი.
კომენტარები