ალეკო ელისაშვილი ბრალის წარდგენის მოლოდინშია. ჯერჯერობით უცნობია, რა მუხლებით წარუდგენენ ოპოზიციონერ პოლიტიკოსს ბრალს.
ადვოკატები და თავად ელისაშვილიც ითხოვს გასაჯაროვდეს თბილისის საქალაქო სასამართლოს კანცელარიის შიდა სივრცის სათვალთვალო კამერების ჩანაწერები, რომელიც ცხადყოფს, როგორ ვითარდებოდა ადგილზე მოვლენები.
უფლებადამცველის თქმით, ხელბორკილებდადებულ ელისაშვილს ფიზიკურად გაუსწორდნენ, რასაც მისი დაზიანებებიც ცხადყოფს. პოლიტიკოსს სილურჯეები სახის არეში აღენიშნება.
ინტერესების დამველი ამბობს, რომ ალეკო ელისაშვილს შეუძლია იმ მანდატურების ამოცნობა, რომლებიც მას ფიზიკურად გაუსწორდნენ. მისივე თქმით, ცეცხლსასროლი იარაღი, რომელიც შსს მიერ გავრცელებულ კადრებში ჩანს, პოლიტიკოსს, უბრალოდ, თან ჰქონდა, ის მის გამოყენებას არ გეგმავდა, თუმცა იარაღი ძირს დაპირისპირებისას დავარდა.
“დღეს ველოდებით ჩვენ ბრალის დადგენილების ჩაბარებას და ხვალ უკვე სასამართლოს, სადა სასამართლო იმსჯელებს აღკვეთთან დაკავშირებით. არ ვიცით ბრალდების დადგენილების ჩაბარების შემდგომ იქ რა მუხლები იქნება მითითებული.
ის ქმედება, რაც მან ჩაიდინა, ეს იყო პროტესტის გამოხატვის ფორმა უსამართლო სასამართლოს მიმართ და სოლიდარობა პოლიტპატიმრებს, ცეცხლი ოლიგარქიას და ცეცხლი უსამართლო სასმართლოს. ეს იყო მისი პოზიცია და მისი დამოკიდებულება. რაც შეეხება რაც გავრცელდა ინფორმაცია, რომ ის იარაღით ემუქრებოდა მანდატურის თანამშრომლებს, ეს არის სიცრუე, რადგან ის მას ტანსაცმლის შიგნით ჰქონდა და დაკავების შემდეგ ამოვარდა. კამერების გასაჯაროების შემდეგ ჩვენ ნათლად დავინახავთ თუ რეალურად რა ხდებოდა, რომ იარაღი მას შემდეგ ამოვარდა და დაკავების შემდგომ, რაც ხელბორკილი დაედო ალეკო ელისაშვილს, როგორ უმოწყალოდ სცემენ დაჭერილ, დაკავებულ პირს, – ამბობს გიორგი რეხვიაშვილი.
“ძლიერი საქართველოს” ერთ-ერთი ლიდერი გუშინ დააკავეს. შსს-ს ამბობს, რომ შენიღბულმა ალეკო ელისაშვილმა სასამართლოს კანცელარიის შენობის დაწვა სცადა. პოლიტიკოსი სისხლის სამართლის წესით არის დაკავებული.
კომენტარები