მალაიზია მომავალი წლიდან 16 წლამდე მოზარდებისთვის სოციალური ქსელების აკრძალვას აპირებს, რითაც უერთდება იმ ქვეყნების მზარდ რიცხვს, სადაც, ბავშვის უსაფრთხოების მიზნით, ციფრულ პლატფორმებზე გარკვეული შეზღუდვების დაწესებას უჭერენ მხარს.
მალაიზიის კომუნიკაციების მინისტრმა ფამი ფადზილმა განაცხადა, რომ მთავრობა გადახედავს მექანიზმებს, რომლებსაც ავსტრალია და სხვა ქვეყნები სოციალურ ქსელებზე ასაკობრივი შეზღუდვის დაწესებისთვის იყენებენ. როგორც მან აღნიშნა, მიზანი ახალგაზრდობის დაცვაა ისეთი ონლაინ საფრთხეებისგან, როგორებიცაა კიბერბულინგი, ფინანსური თაღლითობა და სექსუალური შევიწროება.
“ვიმედოვნებთ, რომ მომავალი წლისთვის სოციალური მედიის პლატფორმები დაემორჩილებიან მთავრობის გადაწყვეტილებას, რომელიც 16 წლამდე ასაკის პირებს ანგარიშების გახსნას აუკრძალავს“, – განუცხადა ფადზილმა ჟურნალისტებს.
ბავშვის ჯანმრთელობასა და უსაფრთხოებაზე სოციალური მედიის გავლენა ბოლო პერიოდში გლობალურად სულ უფრო აქტიურად განიხილება. ზოგიერთი პლატფორმა, მათ შორის TikTok, Snapchat და Meta (Facebook, Instagram, Whatsapp) აშშ-ში რამდენიმე სარჩელის წინაშე დგანან, “მენტალური ჯანმრთელობის კრიზისის გაღვივების” ბრალდებით.
ავსტრალიაში სოციალურ პლატფორმებს ვალდებულება აქვთ, წლის ბოლომდე გააუქმონ ყველა ანგარიში, რომელიც 16 წლამდე პირს ეკუთვნის – კანონს, რომელიც ქვეყანამ გასულ წელს მიიღო, მარეგულირებლები მთელი მსოფლიოდან აკვირდებიან.
ასაკის დადასტურების აპლიკაციას ტესტავენ ერთობლივი ინიციატივით საფრანგეთი, ესპანეთი, იტალია, დანია და საბერძნეთიც.
მინიმალური ასაკის დაწესებას აპირებდა სოციალური ქსელების მომხმარებლებისთვის ინდონეზიაც, თუმცა მოგვიანებით ქვეყანამ ნაკლებად მკაცრი რეგულაცია შეიმუშავა, რომელმაც ტექნოლოგიურ პლატფორმებს თავიანთი ქსელების ნეგატიური კონტენტისგან გათავისუფლება და მკაცრი სავერიფიკაციო ზომების დანერგვა დაავალდებულა.
მალაიზიამ ბოლო წლებში სოციალური მედიის კომპანიები უფრო მკაცრი კონტროლის ქვეშ დააყენა, მავნე კონტენტის, მათ შორის ონლაინ აზარტული თამაშების და რასასთან, რელიგიასთან და სამეფო ოჯახის წევრებთან დაკავშირებული პოსტების ზრდის გამო.
მალაიზიაში, იანვარში ამოქმედებული ახალი რეგულაციის თანახმად, 8 მილიონზე მეტი მომხმარებლის მქონე პლატფორმებსა და მესენჯერებს ახლა ლიცენზიის მიღება მოეთხოვებათ.
კომენტარები