,,სინამდვილეში უარესადაა საქმე” – ლევან ღამბაშიძე

ფილოსოფოსი ლევან ღამბაშიძე:

,,ბოლო დროს ბევრ ადამიანს იჭერენ სრულიად უმიზეზოდ და მაინც ადამიანები სვამენ შეკითხვას: რისთვის? გზაზე იდგა, პირბადე ეკეთა? სტატუსი დაწერა რამე? პოლიციელს აგინა?

ჯერ იმ ქვეყანას რა ვუთხარი, სადაც ჩამოთვლილი მიზეზები ადამიანის დაპატიმრების საფუძველი შეიძლება გახდეს.

მაგრამ სინამდვილეში უარესადაა საქმე და კიდევ უარეს ქვეყანაში ვცხოვრობთ, ვიდრე ერთი შეხედვით ჩანს.

ფერენს სანტას რომანში “მეხუთე ბეჭედი”, უნგრელი სუსის თანამშრომელი ლექციას უტარებს უფრო გამოუცდელ თანამშრომელს წამების მეთოდებისა და მიზნების შესახებ.

შინაარსი ასეთია: არის ხალხი, რომელიც გვეწინააღმდეგება, პოსტერებს აკრავს, გვაგინებს, ბომბებს ისვრის და ლიანდაგებს აფეთქებს. ასეთი ხალხი სულ რამდენიმე ათასი შეიძლება იყოს. ბოლო-ბოლო ყველას დაიჭერ და მოკლავ და ეგაა. მაგრამ ბევრად მეტია მასის ხალხი, მილიონობით… ეგენი არ ისვრიან ბომბებს, უკმაყოფილებას არ გამოხატავენ, ერთი სიტყვით, ხალხი, რომელიც არაფერს აშავებს.

ხოდა როგორ უნდა ვაკონტროლოთ ეგ ხალხი? შიშით.

ამისათვის, უნდა დამნაშავეებთან ერთად უნდა დაიჭირო სრულიად უდანაშაულები და ისინიც აწამო.

კონკრეტულ ოთხ ადამიანზე საუბრისას, ლექტორი ამბობს:

“ამ ოთხმა ადამიანმა უნდა იცოდეს, რომ შენ გაქვს უფლება მათ ცხვირები გაუტეხო, კბილები დააძრო, თირკმელებში ურტყა, აგინო, და რა თქმა უნდა, როდესაც მოგესურვება მათ ტავერნებსა და სახლებში შესვლისა და მათი იქ ცემის უფლებაც. აი ამიტომ უნდა ცემო ხალხი! რათა მათ იცოდნენ, რომ შეიძლება არაფერი შეიძლება აკეთონ, შენ კი ყველაფრის უფლება გაქვს!”

ლექცია ასე მთავრდება:

“მათთან არ ახსენო მიზეზები, თუ რატომ დაემართათ რაც დაემართათ. თუკი ეცოდინებათ, თუ რა დანაშაული ჩაიდინეს და რატომ გალახეს, მაშინ მხოლოდ ის მოქალაქეები შეშინდებიან, რომლებმაც მსგავსი რამ ჩაიდინეს. არაფერი უთხრა მათ! დაე მსოფლიოში ყველას ეშინოდეს – დამნაშავესაც და უდანაშაულოსაც!”

გუშინ რეზი პეტრიაშვილი დაიჭირეს. დაუმორჩილებლობის გამო. და მათი ვერსიით ის მათ არ დაემორჩილა მაშინ, როდესაც მის დასაკავებლად მივიდნენ დაუმორჩილებლობის გამო, რომელსაც ის მათი მისვლიდან რამდენიმე წუთში ჩაიდენდა.

მეორენაირად:

მივიდნენ რომ დაეკავებინათ იმისათვის, რომ ის ამ დაკავების დროს არ დაემორჩილებოდა.

ხო აბსურდია? ხო არალოგიკურია? მაგრამ მიზანი ვიცით. ყველას დავიჭერთ. ყოველგვარი მიზეზის გარეშე. ეს ქვეყანა ჩვენია. რასაც გვინდა იმას ვიზამთ, თქვენ კი ვერაფერს იზამთ.

იმდენი თქვენ რა გითხარით, ან რეზის ან ვინმეს რომ ასე შეაშინებთ. ჩვენია ეს ქვეყანა. ყველაფრის უფლება გვაქვს, რა უფლებებითაც დავიბადეთ და ყველაფერს ვიზამთ, რომ ამ უფლებების განხორციელება შევძლოთ ჩვენც და ჩვენმა შვილებმაც, ისევე როგორც იმ პოლიციელებმაც და მათმა შვილებმაც, რომლებსაც დღეს ყველაზე ბინძურ მჩაგვრელობით საქმიანობას აკეთებინებენ.

არა ხო, ასე გავაგრძელებთ ცხოვრებას, მაგალითად ჩემთვის დარჩენილი 40 წელი?

რანაირად?

თუ გგონიათ რომ მე წავალ? ეგეც რანაირად აბა?“