“მოდით, დავიწყოთ ყველაზე ელემენტარულით” – რომან გოცირიძის “მარტივი კითხვები” კობახიძეს

ყოფილი პარლამენტარი, რომან გოცირიძე:

-რამდენია არაბულ-ქართული ერთობლივი კომპანიის კაპიტალი?

-როგორც ითქვა, ქართული მხარე არის კომპანიის წილის ერთი მესამედის მფლობელი. მიწის გარდა რა შენატანი უნდა განახორციელოს ქართულმა მხარემ კაპიტალში და რამდენად არის შეფასებული მიწისა და სხვა ქართული ქონებრივი თუ არაქონებრივი აქტივების ღირებულება?

-შეაფასა თუ არა ქართული მხარის წილის ღირებულება საერთაშორისო აუდიტორულმა კომპანიამ?

-მსგავსი მიზნებისათვის მთავრობას დაქირავებული ჰყავდა “როტშილდების” კომპანია, რომელსაც 10 მილიონი დოლარი გადაუხადეს ბიუჯეტიდან. მონაწილეობდა თუ არა ეს ან სხვა საერთაშორისო საკონსულტაციო კომპანია ხელშეკრულების შემუშავების პროცესში?

-ბიზნესში მონაწილე მხარეების განცხადებით, არაბულ მხარეს წილის ერთი მესამედი დაეთმო არქიტექტორული პროექტების მომზადების სანაცვლოდ. ვინ შეაფასა ამ პროექტების ღირებულება, მასზე გასაწევი ხარჯების პერიოდულობა, რამდენად თანაზომადია იგი ქართული მხარის შენატანთან შედარებით? 850 ჰექტარი მიწის ღირებულება ტოლია არქიტექტორული პროექტების ღირებულებისა? დაგეგმილზე ნაკლები უძრავი ქონების აშენებისა და რეალიზების შემთხვევაში ( ანუ ნაკლები მოცულობის საპროექტო სამუშაოების გაწევის შემთხვევაში), როგორ იცვლება წილი კაპიტალში? არაბულ მხარეს შეაქვს დამატებითი ფულადი შენატანი თუ იზრდება ქართული მხარის წილი?

-რა მოცულობის ფულადი შენატანი უნდა განახორციელოს არაბულმა მხარემ დარჩენილი მისი კუთვნილი წილის ერთი მესამედის სანაცვლოდ?

ძალიან მარტივი კითხვებია და იმედია დროზე გაგვცემენ პასუხს.