„აკაცუკების“ ძალა – ზურაბ გურული

აშშ-ში მცხოვრები ექიმი, პროფესორი ზურაბ გურული სოციალურ ქსელში წერს:

„აკაცუკების“ ძალა
———————-
პავლო ელიზაროვი მეომარი არ ყოფილა, სავიკ შუსტერის თოქ-შოუს პროდიუსერი იყო, მშვიდი და მშვიდობიანი კაცი. დღეს ის უკრაინის ყველაზე მრისხანე და ეფექტური სამხედრო შენაერთის მეთაურია, პოლკოვნიკის სამხედრო წოდებით.
პავლო ელიზაროვს არც სამხედრო აკადემიებში უსწავლია, არც ხელჩართული ბრძოლის სპეციალისტია და არც სპეც-სამსახურებში გამოწვრთვნილი უნივერსალური მებრძოლი; პავლო ელიზაროვი ტელე-პროდიუსერია, რომელმაც უკრაინელი „აკაცუკები“ შეკრიბა, აი ისეთივე ბიჭები და გოგოები, ჩვენთან რომ დგანან რუსთაველზე და რომლებსაც ჩვენი ენდემური მდაბიოები დასცინიან და მათგან ისეთი კომპიუტერული სამხედრო შენაერთი შეკრა, რომელმაც რუსეთის არმიას 2 ათასზე მეტი მარტო ტანკი აუფეთქა, ჯამში კი 12 მილიარდი დოლარის ზარალი მიაყენა.
დღეს უკრაინის გამძლეობის და შეუპოვრობის ხერხემალი უკრაინელი „აკაცუკების“ ნიჭზე და გამბედაობაზე დგას. უკრაინელმა „აკაცუკებმა“ შეცვალეს აქამდე არსებული ყველა სამხედრო თეორია და ტაქტიკა და ისეთი უნივერსალური და ეფექტური სამხედრო სისტემა შექმნეს, რომელსაც მსოფლიოს უძლიერესი სამხედრო სტრუქტურის მქონე ამერიკა დღეს გამალებული აანალიზებს და სწავლობს.
საქართველოს მომავალი ძლიერებისა და წარმატების გარანტია დაკუნთულ, უპრინციპო გლადიატორებსა და კლასიკური განათლებით დაყურსულ კონფორმისტ მეცნიერებს კი არ ეყრდნობა, არამედ ქართველ „აკაცუკებს“, შეუპოვარ, ფერად, ნათელ, კეთილ ხალხს, რომლებსაც არ შეუძლიათ უსამართლობასთან შეგუება და ამიტომ კომპიუტერული თამაშებიდან გადმოვიდნენ და რეალობაში განსხეულდნენ.
ეს ის ხალხია, რომელსაც ვერც მოისყიდი და ვერც შეაშინებ, რომლებიც ავტორიტეტებად მხოლოდ გულწრფელსა და სამართლიან ადამიანებს აღიარებენ, რომლებსაც მათი დარწმუნება ლოგიკური არგუმენტებით შეუძლიათ და არა დომინირებით, იქნება ეს ინტელექტუალური თუ ფიზიკური.
„აკაცუკები“ უძლიერესები არიან ყველა ასპარეზზე, მომავალი მათია და არ არსებობს ძალა, რომელსაც მათი დათრგუნვა შეუძლია.
გაგიმარჯვოთ აკაცუკებო!