ვოლოდიმირ ზელენსკი – დონალდ ტრამპთან უსაფრთხოების გარანტიების საკითხი განვიხილეთ და აშშ ამას არ ეწინააღმდეგება

დონალდ ტრამპთან უსაფრთხოების გარანტიების საკითხი განვიხილეთ და აშშ ამას არ ეწინააღმდეგება, – ამის შესახებ უკრაინის პრეზიდენტმა, ვოლოდიმირ ზელენსკიმ აშშ-ის პრეზიდენტთან, დონალდ ტრამპთან შეხვედრის შემდეგ ჟურნალისტებს განუცხადა.

„ევროპული მხარე თითქმის მზად არის. უსაფრთხოების გარანტიები უკვე არსებობს ქაღალდზე, იმის შესახებ თუ რისი შეთავაზება შეუძლია ევროპას. ჩვენ აშშ-სგან უსაფრთხოების გარანტიები გვჭირდება, რადგან რუსეთთან საუბარი მხოლოდ აშშ-ს შეუძლია და მხოლოდ პრეზიდენტ ტრამპს აქვს რუსეთთან დიალოგი. ჩვენ ძლიერი უსაფრთხოების გარანტიები გვჭირდება“, – განაცხადა ვოლოდიმირ ზელენსკიმ.

მისი თქმით, „აშშ-ს ესკალაცია არ სურს და ამერიკულმა და უკრაინულმა მხარეებმა გადაწყვიტეს, რომ ამ ეტაპზე შორ მანძილზე მოქმედი სისტემების შესახებ საჯაროდ არ ისაუბრონ“.

„ვფიქრობ, რუსებს Tomahawk-ების ეშინიათ. ეს ძლიერი იარაღია და მათ იციან ჩვენ რა ტიპის სისტემები გვაქვს წარმოებაში. ჩვენ ძლიერი სისტემების კომბინაცია გვჭირდება, სწორედ ამიტომ ეშინიათ რუსებს, რადგან იციან რისი გაკეთება შეგვიძლია მათი გამოყენებით“, – აღნიშნა უკრაინის პრეზიდენტმა.

ამასთან, კითხვაზე, აშშ-ის მიერ Tomahawk-ების გადაცემასთან დაკავშირებით ოპტიმისტურად არის განწყობილი თუ პესიმისტურად, უკრაინის პრეზიდენტმა უპასუხა, რომ „რეალისტურად“.