რუსეთი არ აპირებს სტრასბურგის ადამიანის უფლებათა სასამართლოს გადაწყვეტილების შესრულებას და საქართველოსთვის 253 მილიონი ევროს გადახდას – ამის შესახებ კრემლის პრესმდივანმა დმიტრი პესკოვმა განაცხადა.
მისივე თქმით, გადაწყვეტილებას მოსკოვი არ აღასრულებს, ხოლო ჰიპოთეტური კავშირი ამ თანხის გადახდასა და რუსეთ-საქართველოს ურთიერთობების დათბობას შორის, პესკოვმა „ცალკე თემად“ მოიხსენია.
სტრასბურგის სასამართლოს განჩინება საქმეზე „საქართველო რუსეთის წინააღმდეგ (IV)“ მიღებულ იქნა 2024 წლის აპრილში, ხოლო 2025 წლის 14 ოქტომბერს განისაზღვრა ზიანი – 253 018 000 ევრო, რომელიც უნდა გადახდილიყო საქართველოს 29 000-ზე მეტი დაზარალებული მოქალაქისთვის.
სასამართლომ დაადგინა, რომ რუსეთმა 2008 წლის ომის შემდეგ განხორციელებული ე.წ. ბორდერიზაციის პროცესით სისტემურად დაარღვია ადამიანის უფლებები, მათ შორის:
- 224,25 მილიონი ევრო საკუთრებისა და საცხოვრებლის ხელშეუხებლობის დარღვევისთვის,
- 20 მილიონი ევრო განათლების უფლების შეზღუდვისთვის,
- 5,17 მილიონი ევრო უკანონო დაკავებებისთვის,
- 1,98 მილიონი ევრო წამებისა და არასათანადო მოპყრობის შემთხვევებისთვის,
- 1,3 მილიონი ევრო ძალის გადამეტებისთვის და
- 320 000 ევრო გადაადგილების თავისუფლების შეზღუდვისთვის.
კომენტარები