როგორიც არ უნდა იყოს განაჩენი, თხოვნაა ჩემი, რაც შეიძლება ჩუმად გავიდეთ – ამ სიტყვებით მიმართა პოეტმა ზვიად რატიანმა საკუთარ მხარდამჭერებს, ვიდრე მოსამაართლე გადააწყვეტილებას გამოაცხადებდა.
ცნობისთვის, ზვიად რატიანს 2-წლიანი პატიმრობა მიუსაჯეს
როგორიც არ უნდა იყოს განაჩენი, თხოვნაა ჩემი, რაც შეიძლება ჩუმად გავიდეთ. ნუ აჯაჯგურებთ ამ მანდატურებს. მადლობა ადვოკატებს, ამხელა გული რომ ჩადეთ უშედეგო და უნუგეშო საქმეში.
ნორმალურ გარემოში სილის გაწვნა არავის აზრად არ მოუვიდოდა. უბედურებაც ყველას საერთო გვაქვს. უფრო სწორედ ვართ აბსურდში, რომელიც ერთმა კაცმა და მისმა მომსახურე პერსონალმა შექმნა ამ ქვეყანაში. თავდაყირა დააყენა ყველაფერი – სამოქალაქო აბსურდზე ვლაპარაკობ, როცა მსხვერპლია დამნაშავე, ეს უკვე აბსურდია. ისიც აბსურდია, რომ აქ ყველამ დიდებულად ვიცით, რა გადაწყვეტილებაც არ უნდა გაახმოვანოთ, ყველაფერი არის პირობითი და თავდაყირა.
ტერაქტი რომ დაგერქმიათ, ესეც არ გამიკვირდებოდა ამ საქციელისათვის და ყველაფერს ველოდი სასჯელსაც, დამძიმებასაც. მე შემეძლო სხვა ადგილი მომეძებნა, სადაც კამერები არ არის და მხოლოდ გულის მოფხანა მდომებოდა. გარწმუნებდით, არც ახლა მეფხანება ენა და არც მაშინ მეფხანებოდა გული, რომ მოფარებულში ვინმესთვის შურდული მესროლა.
არჩევანი რომ ყოფილიყო ალბათ ხარებას ვამჯობინებდი, მაგრამ იმ დროს უკვე ჩრდილში იყო.
არ მაწყობდა რიგითი პოლიციელი, ასე დაფორმატდა ჩემი ბრაზი და დიახაც, რაღაც თანამდებობა უნდა ჰქონოდა. ალბათ, ხარებას ვამჯობინებდი და ახლა იმას ვიტყვი რა იყო მიზეზი:
ქართულ ენაში არის ასეთი სიტყვა სინდისი. შეიძლება არ იცოდეთ, რომ ეს სინდისი პირობითი სცენაა და ეს სინდისი ზოგიერთ ადამიანებს აწუხებს. თუნდაც ისეთი მოძველებული, როგორიც მე შემომრჩა ამ ასაკში. ეს სინდისი არ რეგულირდება კანონით. ისევე როგორც სიძულვილი. და ეს სინდისი მართლა მაწუხებდა, როცა ჩემს სახლში მეძინა. საყვარელი ქალის ზრუნვით და გარემოცვაში. ვმეგობრობდი ჩემი ასაკის შვილებთან და ამ ასაკის ახალგაზრდები მიუყვანეს მსხვერპლად ერთ ადამიანს.
არც საამაყოდ ვთვლი ამ სილას, არც სათაკილო და არც დანაშაულოდ, მხოლოდ იმ დათქმით, რომ აბსურდში ვართ.
სილას ენამ ზმნა მოარგო ასეთი – გაწვნა. სილის დარტყმა უგემოვნო ქართულია. მზია ამაღლობელი, ერთ-ერთი ყველაზე გაბედული ადამიანი, შეურაცხყვეს , დაამცირეს და ამის მერე, როცა მან გამწარებულმა პოლიციელს სილა გააწნა, იმ დღიდან ვუყურებთ ამ ქალის ვირტუალურ მკვლელობას თქვენი სამსახურების მხრიდან. შემდეგ – ნინო დათაშვილი. ასევე მუჯლუგუნებით ათრიეს, დაამცირეს და დააპატიმრეს და შემდეგ რაც მოხდა, ისიც ვიცით – ფსიქიატრიულში გადაყვანა მოითხოვეს მისი. 21-ე საუკუნეა. ეს არი არის შუა საუკუნეები, – თქვა პროცესზე რატიანმა.
შეგახსენებთ, რომ სასამართლომ პოეტ ზვიად რატიანს 2 წლით თავისუფლების აღკვეთა მიუსაჯა. კერძოდ, თბილისის საქალაქო სასამართლომ პოლიციელზე თავდასხმისთვის ბრალდებული პოეტს ბრალი სისხლის სამართლის კოდექსის 353-ე მუხლის პირველი ნაწილით [წინააღმდეგობა, მუქარა აწ ძალადობა საზოგადოებრივი წესრიგის დამცველის ან ხელისუფლების სხვა წარმომადგენლის მიმართ] გადაუკვალიფიცირა და აღნიშნული ბრალის მიხედვით ცნო დამნაშავედ.
ზვიად რატიანი პოლიციელზე თავდასხმის ბრალდებით 23 ივნისს დააკავეს.
კომენტარები