ამბობენ, რომ თუ სახლიდან სახლში ავეჯის გადატანა ქარიშხლს ჰგავს, აი, ოფისიდან ოფისში ავეჯის გადატანა ნამდვილი ცუნამია და შტორმია, მიწისძვრით, წყალდიდობით, ზვავით. თუ არასოდეს გადაგიტანია ოფისიდან ავეჯი, გაგიჭირდება მიხვდე, რას ვგულისხმობ. ალბათ, გგონია, დიდი სხვაობა არ უნდა იყოს, ავეჯი, ხომ ავეჯია?
კი, ავეჯი ავეჯია და ჯამი – ჭურჭელი, ოღონდ, ოფისის ავეჯს სპეციფიკაც სხვა აქვს და საშუალო ზომის ოფისში ხალხის რაოდენობაც ბევრად მეტია, ვიდრე ნებისმიერ სახლში. გადაიტან სახლიდან სახლში საწოლს, ან სავარძელს და ოჯახის რომელ წევრსაც უნდა ჰკითხო, ყველამ იცის, ვისია და ვის ოთახში უნდა დაიდგას. აი, ოფისში, –ბოდიში. კითხვას, ეს ვისი სკამია? – აქ ათამდე პასუხი აქვს: 1. არ ვიცი. 2. ანას რომ კითხოთ? ანა როგორ არ იცით? მაღალი, შავთმიანი. 3. ყველა მაღალი და შავთმიანი ანა კი არაა, ბატონო. 4. ჩემსას ჰგავს, რომ გადააბრუნოთ? – უი, არა ჩემსას ბორბლები ასე გაცვეთილი არ აქვს. 5. საიდან წამოიღეთ? ყავის აპარატიდან მარჯვნიდან, მეექვსე ოთახის კარიდან ხელმარცხნივ, მესამე ფანჯრის მოპირდაპირედ იდო? 6. რა მნიშვნელობა აქვს ვისია, სკამი სკამია. 6. ჩემს ოთახში სხვის სკამს ნუ დამიტოვებთ, გთხოვთ. 7. შეგიძლიათ დადგათ? თუ არ დავჯდები, ვერ მივხვდები ჩემია, თუ არა. 8. ეს საერთოდაც ჩვენი ოფისის სკამს არ ჰგავს, დერეფნიდან ხომ არ გამოგყვათ? და ა.შ.
პირველი, რაც უნდა გაითვალისწინო, ეს არის – დრო. ოფისში ადამიანები მუშაობენ, შესაბამისად, თითოეული გაცდენილი დღე, დაკარგული შემოსავალია. დიახ, დრო – ფულია. წინასწარ უნდა დაგეგმო, რომელი დღეების გამოყენება შეგიძლია, რამდენი დღის გამოყოფა შეგიძლია და არა, ჯერ არ დაურეკო, ავეჯის გადაზიდვის სერვისს, ჯერ მხოლოდ დღეები ჩაინიშნე.
მეორე – აღწერა
ყველა ნივთი აღწერე. ოღონდ არ დაავალო ყველაფრის აღწერა ერთი და იგივე პირს. მაგალითად, ტექნიკის აღწერას თუ დაავალებ ბუღალტერს, ის გეტყვის, რომ გაქვს 99 პრინტერი, 39 კომპიუტერი და 37 ტელევიზორი, მაგრამ იგივე საქმეს თუ შეასრულებს ტექნიკოსი, ის გეტყვის, რომ გაქვს 99 პრინტერი, კი, ოღონდ აქედან მუშაობს 45, 30 ვერ გაკეთდება უკვე და 24 კი ექვემდებარება აღდგენას. ცხადია, ტექნიკოსს, წინასწარვე უნდა მისცე დავალება, რომ ყველა ნივთი დაასტიკეროს, გადასაგდებსაც დააწეროს და შესაკეთებელსად, მუშა მდგომარეობაში მყოფ ტექნიკასაც და დამატებით დააწეროს, ხომ არაა რომელიმე კონკრეტული ოთახის ან პირის გამოსაყენებლად განკუთვნილი.
არ დაგავიწყდეს:
ნუ გადაყრი, თუნდაც, გაფუჭებულ ტექნიკას, ბუღალტრის გარეშე – აი, გადასაყრელი ნივთების „ჩამოსაწერად“ ნამდვილად გჭირდება ბუღალტერი. თუ სასურსათო ბიზნესი გაქვს, საწყობს ცლი და თუ ეს დიდი ოდენობით საკვები პროდუქტია, საერთოდაც, მის გადაყრას, ანუ განადგურებას, სპეციფიკური წესი აქვს.
ანალოგიურად აღწერ ავეჯს, სტიკერების გამოყენებით, როგორც ტექნიკას.
შემდეგ თითოეულ თანამშრომელს სთხოვ, გადაახარისხოს დოკუმენტები, რაც არ სჭირდება და გადასაგდებია, ცალგე დადოს და დანარჩენი, თუ არ აქვს უკვე განთავსებული საქაღალდეებში, ის დროა განათავსოს, დაასტიკეროს და გაამზადოს ყუთებში შესაფუთად.
აი, ამის შემდეგ უკვე შეგიძლია ავეჯის გადამზიდ კომპანიას დაურეკო, რადგან შენ იცი ორი რამ, რის მიხედვითაც ის ფასს განსაზღვრავს – სამუშაოს დრო და საათები და მეორე – გადასაზიდი ავეჯის და ტექნიკის რაოდენობა.
იმ შემთხვევაში, თუ გსურს სრული მომსახურების შეკვეთა, მაშინ ყუთებსაც ავეჯის გადამზიდი კომპანია მოგიტანს და ზუსტად უნდა უთხრა რამდენი და რა ზომის ყუთი, რამდენი ტომარა, რამდენი ნაჭრის ჩანთა დაგჭირდება გადასაზიდად. მეორე ვარიანტია, ყველა ნივთი თავად ჩაალაგო, თანამშრომლებთან ერთად და უთხრა, დამატებით რამდენი ყუთი იქნება გადასაზიდი და რა ზომის. ორივე ნორმალური მეთოდია, თუმცა, მე მესამე, შერეული მეთოდი მომწონს, ასე უფრო სახალისოცაა დამაქსიმალურად ხდება ავეჯის გადასაზიდად გამოყოფილი დროის გამოყენება. სამუშაოც ბევრად ეფექტურად სრულდება, როგორ წესი. შერეული ტიპი მომსახურება მოიცავს, გადამზიდ კომპანიას სთხოვო, მოიტანოს ყუთები, ეუბნები რამდენი და რა ზომის და სანამ გადამზიდი კომპანიის თანამშრომლები ავეჯს გადაიტანენ მანქანაში, ზოგს დაშლიან და ისე, ზოგს – დაუშლელად, დაამაგრებენ, მანქანაში რომ არ იმოძრაოს და დაზიანდეს, მანამდე შენ და შენი თანამშრომლები პირად ნივთებს და დოკუმენტებს, რომლებიც უკვე დახარისხებულია, ჩაალაგებთ ყუთებში და დააწერთ საკუთარ სახელებს. შენზე უკეთ შენს პირად ნივთებს ვერავინ ჩაალაგებს.
გაითვალისწინე 3 მთავარი დეტალი:
- ტექნიკას, კომპიუტერულ ნაწილებს ბევრად კომფორტულად გადაიტან, თუ ნაწილებს ცალკე ყუთში მოათავსებ და ძირითად ბირთვს ცალკე – ოღონდ, ცხადია, დასტიკერება არ უნდა დაგავიწყდეს, რათა მერე მარტივად ააწყო. ცხადია, ამ საქმესაც აკეთებს ტექნიკური სამსახური. გააკონტროლე, რომ ტექნიკური სამსახურის თანამშრომელმა ადვილად მისაგნებად შეინახოს სახრახნისი მაგალითად, ანუ ის ნივთები, რომლებიც ტექნიკის დაშლაში გამოიყენა და აწყობაშიც გამოადგება.
- სამზარეულოს ნივთები – როგორც წესი, ოფისის სამზარეულოში, შენს თანამშრომლებს პირადი ნივთები აქვთ, საყვარელი ჭიქა თუ თეფში, მაგალითად. სამზარეულოს წვრილმანი ნივთები ცალკე ყუთში შეფუთეთ.
- უმნიშვნელოვანია ნივთები, რომლებსაც ოფისის დასალაგებლად, დასაწმენდად იყენებენ, პარკი იქნება, თუ ყუთი, ის ერთი–ერთი ბოლო უნდა იყოს, რომელსაც ავეჯის გადაზიდვის სერვისი ავტომანქანაზე განათავსებს, რადგან ამ ყუთში ის ნივთებია, რომლებიც ახალ ოფისში ავეჯის გადატანისას, შეიძლება პირველ რიგში დაგჭირდეს.
დამატებით, არ დაგავიწყდეს, წინასწარ გაითვალისწინო წყალი, ყავა, ჩაი, ერთჯერადი ჭიქები, ჩანგლები, თეფშები, რათა, მაქსიმალურად ნაკლები დრო დაიკარგოს მერე რომელიმეს ძებნაში, ან რეცხვაში.
ბოლო გამომსვლელის ეფექტი:
როცა სრულად დაცალე ოფისი, ვიღაც ერთმა უნდა ჩამოუაროს ყველა ოთახს, ყველა კედლის კარადას, ყველა მაგიდას, რომელიც რჩება ძველ ოფისში და შეამოწმოს, ხომ არ გრჩებათ სადმე რამე დოკუმენტი. ეს პოტენციურ დანაკარგებს აგარიდებს თავიდან
ავეჯი უნდა დაიშალოს, თუ არა?
ეს რომ იყოს სახლიდან სახლში ავეჯის გადატანა – უყოყმანოდ გეტყოდი, რომ კი, აუცილებლად. ჯერ ერთი, როგორც წესი, სახლში შეიძლება ბევრად ძვირადღირებული და ფაქიზი ავეჯი გქონდეს, ვიდრე ოფისში. მეორე – ოფისიდან ოფისში როცა გადაგაქვს ავეჯი, სამუშაო პროცესი ჩერდება და ავეჯის დაშლა და შემდგომ აწყობა კი, დიდ შრომა და დროს მოითხოვს. იმ შემთხვევაში, თუ ძველი და ახალი ოფისის კარი იმხელაა, რომ მასში ავეჯი დაუშლელად გაეტევა, თუ შეეტევა, სჯობს არ დაშალო. ოღონდ, ამ შემთხვევაში, ეძებ ავეჯის გადამზიდ კომპანიას, რომელიც სატვირთო მანქანით მოგემსახურება, სატვირთო მანქანის უკანა ნაწილში დაალაგებს ავეჯს, ექნება თასმები, თუ სხვადასხვა არაკაუჭოვანი დასამაგრებლები, რათა ავეჯმა არ იმოძრაოს და ერთმანეთს არ შეეხეთქონ და ეყოლება მეტი მუშახელი, რადგან დაუშლელი ავეჯის გადაზიდვას მეტი ადამიანი სჭირდება.
სკამი ავეჯია?
ზოგადად – კი, ოფისის შემთხვევაში, ავეჯზე ბევრად მეტია, პრაქტიკულად შენი სამუშაო ადგილია, რომელიც კომფორტული უნდა იყოს მაქსიმალურად. ამიტომ, მაშინაც კი, თუ ავეჯს არ დაშლი გადატანისას, არც შეფუთავ, სკამების ეს ნაწილები უნდა შეფუთო საიმედოდ – კუთხეები, ბორბლები, მისი მოძრავი ელემენტები, სახელურები,
ამინდი:
ამინდი რაღა შუაშია? – მეტყვი, ახლა, ხომ? ავეჯს „არ უყვარს“ ტემპერატურის მკვეთრი ცვლილება. იგი უარყოფითად მოქმედებს ავეჯის მასალაზე, შესაკრავებსა და მოძრავ ელემენტებზე, დეტალებზე. ტრანსპორტირებამდე, ტრანსპორტირების და ტრანსპორტირების შემდგომი პერიოდის ტემპერატურა უნდა იყოს დაახლოებით ერთნაირი. მაგალითად, თუ ზამთარში გადაგაქვს ნივთები ოფისიდან ოფისში, ძველ ოფისშიც მაგრად ცხელა, მოკლემკლავიანი მაისურებით დადიხართ და ახალ ოფისშიც ასეთივე კარგად მუშაობს გათბობის სისტემა, გარეთ კი, მინუმ 5 გრადუსია, მინიუმ 1 დღე არ გაათბო ოფისები, ან 30 გრადუს სიცხემდე მაინც არ გაათბო, ეცადე რომ მაქსიმალურად ახლოს იყოს ოფისის და ქუჩის ტემპერატურები ერთმანეთთან და მათ შორის არ იყოს სხვაობა 20 და მეტი გრადუსით.
და ბოლოს, იმედია, იმის თქმა არ მჭირდება, რომ უნდა დარწმუნდე, ავეჯსა და ტექნიკას არაპროფესიონალები არ შეეხებიან გადასატანად, მათ შორის, არც შენი თანამშრომლები, არც შენ, რადგან შეიძლება დააზიანო. გაფხაჭნო, ავეჯის გადატანა ზოგადადც ძალიან სპეციფიკური საქმეა, მით უფრო, თუ დაუშლელად გადაგაქვს.
ყველაზე რთული უკან ჩამოვიტოვეთ და დარჩა ავეჯის გადამზიდი კომპანიის შერჩევა. ეს ყველაზე მეტად გამარტივდა ახლა, როცა უკვე არსებობს კატალოგი კომპანიების, მზა კონტაქტების ბაზა არსებობს, ოფისიდან გაუსვლელად, ან სახლიდან, ლანჩის დროს შეგიძლია შეარჩიო, დაურეკო, მოელაპარაკო. შენ უკვე იცი, რომ უნდა მოელაპარაკო იმის მიხედვით, რა დრო გაქვს გამოყოფილი ოფისის დასაცლელად და რა მოცულობის სამუშაო შესასრულებელი. როცა ეს ორი მდგენელი იცი, უკვე ავეჯის გადამზიდი კომპანიის შერჩევა და მასთან შეთანხმება მარტივია.
(R)
კომენტარები