„ომის დასრულება უნდა იყოს სამართლიანი” – ზელენსკი

უკრაინის პრეზიდენტმა ვოლოდიმირ ზელენსკიმ განაცხადა, რომ ომის დასრულება უნდა იყოს სამართლიანი და შეესაბამებოდეს ევროპელი ხალხების უსაფრთხოების ინტერესებს. ამის შესახებ მან 10 აგვისტოს სოციალურ ქსელებში დაწერა.

„ომის დასრულება უნდა იყოს სამართლიანი და მადლობელი ვარ ყველასი, ვინც ახლა უკრაინისა და ჩვენი ხალხის გვერდით დგას იმ მშვიდობისთვის, რომელიც იცავს ჩვენი ევროპელი ხალხების სასიცოცხლო უსაფრთხოების ინტერესებს,“ – აღნიშნა ზელენსკიმ.

მან ხაზი გაუსვა, რომ უკრაინა აფასებს და სრულად უჭერს მხარს ერთობლივ განცხადებას, რომელიც გააკეთეს საფრანგეთის პრეზიდენტმა ემანუელ მაკრონმა, იტალიის მინისტრთა საბჭოს თავმჯდომარემ ჯორჯია მელონიმ, გერმანიის კანცლერმა ფრიდრიხ მერცმა, პოლონეთის პრემიერ-მინისტრმა დონალდ ტუსკმა, დიდი ბრიტანეთის პრემიერ-მინისტრმა კირ სტარმერმა, ევროკომისიის თავმჯდომარემ ურსულა ფონ დერ ლაიენმა და ფინეთის პრეზიდენტმა ალექსანდრ სტუბმა უკრაინის მშვიდობის საკითხზე.