აშშ-ის პრეზიდენტ, დონალდ ტრამპსა და რუსეთის ლიდერს, ვლადიმერ პუტინს შორის 15 აგვისტოს ალასკაზე დაგეგმილ სამიტს, შესაძლოა, უკრაინის პრეზიდენტი, ვოლოდიმირ ზელენსკიც შეუერთდეს. ინფორმაციას CBS News-ი ავრცელებს.
როგორც ტელეარხს თეთრი სახლის ერთ-ერთმა მაღალჩინოსანმა განუცხადა, პუტინისა და ტრამპის სამიტის დაგეგმვა ჯერ არ დასრულებულა და სავსებით მოსალოდნელია, რომ ზელენსკიმ მასში „რამე ფორმით“ მიიღოს მონაწილეობა.
ამასთანავე, CBS News-ი რუსი ბიზნესმენის, პუტინის მრჩევლის კირილ დმიტრიევის განცხადებას ავრცელებს, სადაც ის აღნიშნავს, რომ რუსეთმა და ამერიკამ უნდა ითანამშრომლონ გარემოსდაცვით, ინფრასტრუქტურისა და ენერგეტიკის სფეროებში არქტიკასა და მის ფარგლებს გარეთ. რუსეთ-უკრაინის ომის შესახებ დმიტრიევი არაფერს ამბობს.
CBS News-ის ინფორმაციით, ტრამპისა და პუტინის შეხვედრა უკრაინაში ცეცხლის შეწყვეტის შესახებ ორ ქვეყანას შორის მიმდინარე მოლაპარაკებების ფონზე გაიმართება. ეს იქნება რუსეთისა და აშშ-ის ლიდერების პირველი შეხვედრა, მას შემდეგ, რაც 2021 წელს შვეიცარიაში პუტინი ჯო ბაიდენს შეხვდა და რვა თვეში უკრაინაში ომი დაიწყო.
კომენტარები