Washington Post და Financial Times აშშ-ისა და უკრაინის ლიდერებს, დონალდ ტრამპსა და ვოლოდიმირ ზელენსკის შორის რამდენიმე დღის წინ გამართული სატელეფონო საუბარის შესახებ დამატებით დეტალებს ავრცელებენ.
მათი ცნობით, პრეზიდენტებს შორის საუბარი ომთან დაკავშირებულ არაერთ საკითხს შეეხებოდა. ერთი რამ, რაც ამ დიალოგს წინებისგან განასხვავებდა ტრამპის პოზიციის ცვლილებაა.
გამოცემები თეთრ სახლში არსებულ წყაროებზე დაყრდნობით წერენ, რომ ტრამპი, ახლა, რუსეთის მიმართ, უფრო აგრესიული მოქმედების მომხრეა, ანუ სურს, დაიწყოს “ესკალაცია დეესკალაციისთვის.”
როგორც წყარომ WP-ს განუცხადა, ტრამპმა ზელენსკის ჰკითხა: “ვოლოდიმირ, შეგიძლიათ მოსკოვს დაარტყათ? სანქტ-პეტერბურგს?”, რაზეც ზელენსკიმ უპასუხა, რომ უკრაინას ამის გაკეთება შეუძლია, თუ ვაშინგტონი მათ შესაბამის შეიარაღებას მიაწვდის. ამასთან, ტრამპმა დაამატა, რომ უკრაინამ ზეწოლა სწორედ ამ ორ ქალაქზე უნდა გააძლიეროს.
წყაროების თქმით, ტრამპის ამგვარი პოლიტიკის ძირითადი მიზანია, “რუსებს ტკივილი აგრძნობინოს” და დააბრუნოს მოსკოვი მოლაპარაკების მაგიდაზე.
რამდენიმე დღის წინ ცნობილი გახდა, რომ ვაშინგტონი უკრაინას Patriot-ის ტიპის საჰაერო თავდაცვის სისტემებს გადასცემს
აშშ-ის თავდაცვისა და NATO-ს წევრი ქვეყნების წარმომადგენლებთან შუამავლებთან შეხვედრის დროს, ზელენსკიმ მიიღო შორი რადიუსზე მოქმედი სისტემების სია, რომლებიც, შესაძლოა, უკრაინისთვის მესამე მხარის შუამავლობით გახდეს შესაძლებელი. ეს შეთანხმება ტრამპს საშუალებას მისცემს, ევროპელი მოკავშირეებისთვის იარაღის გაყიდვის ავტორიზაციის გზით, გვერდი აუაროს კონგრესის მიერ აშშ-ის პირდაპირი სამხედრო დახმარების ამჟამინდელ შეზღუდვას.
WP-ს წყარომ ასევე გაანდო, რომ არ არის გამორიცხული, დონალდ ტრამპმა კიევს დართოს ნება, გამოიყენოს შორ მანძილზე მოქმედი რაკეტები. სავარაუდოდ საუბარია, უკრაინაში ამჟამად უკვე განლაგებულ ATACMS-ის ტიპის 18 რაკეტაზე, რომელთა რადიუსიც 300 კილომეტრია. მოსკოვი და სანქტ-პეტერბურგი ამ რაკეტების რადიუსის მიღმაა, თუმცა მათი საშუალებით შესაძლებელი იქნება რუსეთის სიღრმეში მდებარე სამხედრო ბაზებზე, აეროდრომებსა და საწყობებზე იერიშის მიტანა. ამ მოსაზრებას ამყარებს ის ფაქტიც, რომ პენტაგონის ოფციალური პირები თვეების განმავლობაში ემხრობოდნენ, ATACMS-ების გამოყენებით, რუსეთზე უფრო ღრმა დარტყმების განხორციელებას.
კომენტარები