“დამსაჯეს დიდებულად” – საგარეო საქმეთა სამინისტროდან კიდევ ერთი საჯარო მოხელე გაუშვეს

საგარეო საქმეთა სამინისტროდან კიდევ ერთი საჯარო მოხელე გაათავისუფლეს. ამის შესახებ მარიამ მაისაია სოციალურ ქსელში წერს.

საჯარო მოხელე პირდაპირ წერს, რომ საკუთარი პოზიციის ხმამაღლა გაჟღერებისთვის ისჯება.

აი, ხომ შეიძლება შეურაცხყოფილად ვგრძნობდე თავს, ან დამცირებულად.. არა და არ მოვიდა რომელიმე ეს გრძნობა.. ანარადა ორ კვირაზე მეტი კი გავიდა ამასობაში.. პირიქით, თავი ძალიან მაგარი და ღირსეული მგონია. უბრალოდ, “ხვალ” არ ვიცი რას ვაკეთებ და რა მელის და ეს ცოტათი მიფუჭებს ამ განწყობას.

ჰო, ვინც არ იცით, სამსახურიდან გამაგდეს 1 აგვისტოდან, თუ მაგდებენ.. ნუ როგორც არის.

1997 წლიდან, საგარეო საქმეთა სამინისტრო იყო ჩემი სამსახური სხვადასხვა მისიებით, მაგრამ ერთი მიზნისკენ, რისი ხმამაღლა გაჟღერებისთვის და კიდევ ერთხელ დადასტურებისთვის დამსაჯეს დიდებულად.
ჰოდა სანამ არკვევენ, მე დიფსთეითის მორჩილი ვარ, გლობალური ომის პარტიის წევრი, თუ სხვა რომელიმე მსგავსი გარე ძალის მიერ მართული, ჩემი, ერთწევრიანი, პოლიტიკური პარტიის ხედვას გაგიზიარებთ: 

რაც აქ ვარ, ქართველთან – ჩამოსულთან თუ აქ მყოფთან – როცა ვსაუბრობ, ყველა ერთად ვთანხმდებით თუ როგორი მაგარი ქვეყანაა შვეიცარია, როგორ ჰგავს ამ ორი ქვეყნის ულამაზესი ბუნება ერთმანეთს და როგორ თავისუფლად შეიძლება ჩვენც გვქონდეს ასეთი ქვეყანა.. კი, ნამდვილად შესაძლებელია, მაგრამ ამას ვერც დასჯილი, ვერც მორჩილი, ვერც დაბოღმილი, ვერც მოძალადე, ვერც შეშინებული, ვერც დათრგუნული და ვერც გულგრილი ხალხი ვერ გააკეთებს. ასეთ საზოგადოებად და სახელმწიფოდ ჩამოყალიბებას სხვა ენერგია სჭირდება – პოზიტიური, ლაღი, გაბედული და თავისუფალი.. ჰოდა დაველოდოთ უკეთეს დროს, ღმერთის იმედად, – წერს მაისაია.