,,მე ვიყავი იმ დროს მინისტრი, ჩემთვის ცნობილი იყო, რომ საგუშაგო უნდა განთავსებულიყო“ – მაია ცქიტიშვილი ჩორჩანას საგუშაგოზე

რეგიონალური განვითარების და ინფრასტრუქტურის ყოფილი მინისტრი, მაია ცქიტიშვილი გენერალურ პროკურატურაში ჩორჩანას ეპიზოდთან დაკავშირებით გამოიკითხა:

,,მე ვიყავი იმ დროს მინისტრი, ჩემთვის ცნობილი იყო, რომ საგუშაგო უნდა განთავსებულიყო, ასევე იმასთან დაკავშირებით, რომ გზის გაყვანის საჭიროება იყო, რადგანაც არსებობდა, როგორც ტერიტორიის მიტაცების რისკი, ასევე, ბორდერიზაციის აქტიური პროცესიდან გამომდინარე, ვერ გეტყვით, იყო თუ არა შეთანხმებული, ვისთან, როგორ, მაგრამ ეს იყო ცნობილი, ჩემთვის, როგორც მინისტრისთვის.

ჩორჩანაში მიმდინარე ბორდერიზაციის პროცესის თაობაზე მსჯელობა დაიწყო ჯერ კიდევ 2019 წლის დასაწყისში, აქტიურად, სადაც ჩვენ ყველანი ვხედავდით, რომ საფრთხე არსებობდა და შესაბამისად, და ჩემი ვარაუდით, სწორედ საფრთხეებიდან და გაანალიზებიდან გამომდინარე, საფრთხეები იყო შეფასებული და შეფასების შედეგად შს სამინისტროს მიერ იყო განხორციელებული ის ქმედებები, რომლებიც იყო. მედია არქივსაც თუ გადახედავთ, დაინახავთ, რომ მრავალი შემთხვევა იყო, იგივე ჩორჩანას ტერიტორიიდან, ისევე როგორც საოკუპაციო ხაზის გასწვრივ, სხვა მონაკვეთების მიმდებარედ, სამწუხაროდ, ბორდერიზაციის პროცესი, წლების განმავლობაში მიმდინარეობს და შესაბამისად, სავარაუდოდ, ამავე ტერიტორიაზე არსებული საფრთხეებიდან გამომდინარე, იქნა ეს გადაწყვეტილება მიღებული”

ჟურნალისტის შეკითხვაზე, იყო თუ არა მომხრე საგუშაგოს მოწყობისა, ყოფილი მინისტრი პასუხობს, რომ ამ შემთხვევაში ეს მისი კომპეტენცია არ არის.

“ნაკლებად მაქვს სურვილი დიდად დეტალებში შესვლის. […] ჩემთვის ცნობილი იყო, იმასთან დაკავშირებით, რომ საგუშაგო უნდა განთავსებულიყო, ასევე იმასთან დაკავშირებით, რომ გზის გაყვანის საჭიროება იყო იმ ეტაპზე, რადგან არსებობდა როგორც ტერიტორიის მიტაცების რისკი, ასევე ბორდერიზაციის აქტიური პროცესიდან გამომდინარე

[…] ვერ გეტყვით, იყო თუ არა შეთანხმებული, ვისთან, რა ფორმით, მინდა გითხრათ, რომ ჩემთვის, როგორც მინისტრისთვის, იყო ცნობილი”